కాంగ్రెస్ షాక్ : CWCని రద్దు చేసిన రాహుల్

rahul-gandhi-1ఇవాళనే ప్లీనరీ తేదీ ఖరారు

కాంగ్రెస్‌ వర్కింగ్‌ కమిటీ(CWC)ని  రద్దు చేశాడు AICC అధ్యక్షుడు రాహుల్‌ గాంధీ. దాని స్థానంలో 34 మంది సభ్యులతో సారథ్య సంఘాన్ని రాహుల్‌ నియమించారు. ఈ సారథ్య సంఘం ఇవాళ సమావేశమై ప్లీనరీ తేదీని ఖరారు చేస్తుంది. మార్చి 5న పార్లమెంట్‌ సమావేశాలు ప్రారంభమవుతాయి. ఆలోపే ఈ ప్లీనరీ జరుగుతుందని, ఢిల్లీలో ఒకే రోజు జరిగే ప్లీనరీలో రాహుల్‌ నేతృత్వంలో కొత్త వర్కింగ్‌ కమిటీని ఎన్నుకుంటారు.  పార్టీ నిబంధనావళి ప్రకారం ప్లీనరీ తేదీని నిర్ణయించే ముందు వర్కింగ్‌ కమిటీని రద్దు చేసి ఆ కమిటీని ప్రత్యేక ఆహ్వానితులతో సహా సారథ్య సంఘంగా మార్చడం ఆనవాయితీ. ప్లీనరీ తేదీని నిర్ణయించడం, సమావేశ అజెండా, తీర్మానాలు, వర్కింగ్‌ కమిటీ ఎన్నిక తీరుతెన్నులను నిర్ణయించడం ఈ సారథ్య సంఘం బాధ్యత. కొత్త వర్కింగ్‌ కమిటీ ఎన్నుకున్న తర్వాత సారథ్య సంఘం రద్దవుతుంది. సారథ్య సంఘంలో రాహల్‌, కాంగ్రెస్‌ మాజీ అధ్యక్షురాలు సోనియాగాంధీ, మాజీ ప్రధాని మన్మోహన్‌సింగ్‌, ఏకే ఆంటోనీ, అహ్మద్‌ పటేల్‌, అంబికా సోనీ ఉన్నారు. తెలుగు రాష్ట్రాలకు చెందిన వారెవ్వరూ ప్రస్తుతం వర్కింగ్‌ కమిటీలో లేనందున వారు సారథ్య సంఘంలో కూడా లేరు. వర్కింగ్‌ కమిటీలో 12 మందిని నామినేట్‌ చేసి 11 మందిని ఎన్నుకోవాల్సి ఉండగా, అందర్నీ నామినేట్‌ చేసే అధికారం రాహుల్‌గాంధీకి అప్పగిస్తూ ఏఐసీసీ సభ్యులందరూ లేఖలు సమర్పిస్తారని తెలుస్తుంది. రాహుల్‌ గాంధీ టీమ్‌లో సోనియా, మన్మోహన్‌ సింగ్‌, అహ్మద్‌ పటేల్‌, గులాం నబీ ఆజాద్‌, మల్లికార్జున్‌ ఖర్గే, అశోక్‌ గెహ్లాట్‌, సుశీల్‌ కుమార్‌ షిండే, ఆస్కార్‌ ఫెర్నాండెజ్‌, జ్యోతిరాదిత్య సింధియా, జితేందర్‌ సింగ్‌, అజయ్‌ మాకెన్‌ లు ఉంటారని తెలుస్తోంది. తెలంగాణ నుంచి సీనియర్‌ కాంగ్రెస్‌ నాయకుడు జైపాల్‌ రెడ్డి పేరు పరిశీలనలో ఉన్నట్లు సమాచారం. రాహుల్‌ టీమ్‌లో సగానికిపైగా పాత నేతలున్నప్పటికీ మిగతా వారు యువ నేతలు ఉంటారని, రాష్ట్రాల ఇన్‌చార్జిలుగా ఉన్న యువ నేతలందర్నీ ప్రత్యేక ఆహ్వానితులుగా వర్కింగ్‌ కమిటీ సమావేశాలకు ఆహ్వానిస్తారని పార్టీ వర్గాలు తెలిపాయి.

Posted in Uncategorized

Latest Updates