బీ రెడీ: జూన్ 1న..18వేల పోలీసు పోస్టులకు నోటిఫికేషన్

ts-policeనిరుద్యోగులకు గుడ్ న్యూస్. జూన్ 2న రాష్ట్ర ఏర్పాటు సందర్భంగా పోలీస్‌శాఖ మరో భారీ నోటిఫికేషన్‌ ఇచ్చేందుకు రంగం సిద్ధం చేసింది. కొత్త జిల్లాల్లోని పోలీస్‌ విభాగాల్లో సబ్‌ ఇన్‌స్పెక్టర్, కానిస్టేబుల్‌ పోస్టులతోపాటు కొత్త బెటాలియన్లు, ఆర్మ్‌డ్‌ రిజర్వ్, ట్రాన్స్‌పోర్టు ఆర్గనైజేషన్‌ సిబ్బంది భర్తీకి చర్యలు చేపట్టింది.  పోలీస్‌శాఖ నుంచే ఏకంగా 18 వేల పోస్టులను భర్తీ చేసేందుకు జూన్‌ 1న నోటిఫికేషన్‌ ఇవ్వనుంది. దీనికి సంబంధించి ప్రభుత్వం నుంచి పోలీసుశాఖకు ఇప్పటికే గ్రీన్‌సిగ్నల్‌ వచ్చినట్లు సమాచారం.

పోలీసు పోస్టుల భర్తీలో ఎలాంటి మార్పులు లేవని రిక్రూట్‌మెంట్‌ బోర్డు అధికారులు స్పష్టం చేశారు. ఆన్‌లైన్‌ విధానంలో దరఖాస్తుల స్వీకరణ ఉంటుందని, మహిళలకు సివిల్‌ విభాగంలో 33 శాతం, ఆర్మ్‌డ్‌ రిజర్వ్‌ విభాగంలో 10 శాతం రిజర్వేషన్‌ ఉంటుందన్నారు. గతంలోలాగే మౌఖిక పరీక్షల ద్వారానే నియామక ప్రక్రియ ఉంటుందని తెలిపారు. ఆన్‌లైన్‌ ద్వారా పరీక్షలను నిర్వహించేందుకు కసరత్తు చేసినా లక్షల మంది హాజరవుతున్న క్రమంలో అంత మంది అభ్యర్థులకు ఒకేసారి కంప్యూటర్లు అందుబాటులో ఉండటం కష్టసాధ్యమని భావించి వెనక్కి తగ్గినట్లు ఉన్నతాధికారులు తెలిపారు.

రాష్ట్ర ఆవిర్భావం తర్వాత మొదటిసారి జరిగిన పోలీస్‌ నియామక ప్రక్రియలో అన్ని వర్గాల అభ్యర్థులకు ప్రభుత్వం నాలుగేళ్ల వయోసడలింపు కల్పించింది. అయితే ఈసారి కూడా వయోసడలింపు అమలు చేయాలని నిరుద్యోగుల నుంచి ఒత్తిడి వచ్చినా ప్రభుత్వం నుంచి తమకు ఎలాంటి ఉత్తర్వులు రాలేదని పోలీస్‌ రిక్రూట్‌మెంట్‌ బోర్డు తెలిపింది. ఒకవేళ నోటిఫికేషన్‌ తర్వాత ప్రభుత్వం నిర్ణయం తీసుకుంటే సవరించి మళ్లీ నోటిఫికేషన్‌ ఇచ్చే అవకాశాలున్నాయని తెలిపింది. గతంలో 10 వేల పోస్టులకు జరిగిన నియామకాలకు 7.5 లక్షల మందికిపైగా అభ్యర్థులు దరఖాస్తు చేసుకోగా ఈసారి కూడా అదే రీతిలో స్పందన ఉంటుందని అధికారులు భావిస్తున్నారు.

Posted in Uncategorized

Latest Updates