భారతదేశ రుచి ఇప్పుడు ప్రపంచాన్ని ఆకట్టుకుంటోంది. మన ఘాటైన పోపులు, నెమ్మదిగా ఉడికించిన సాస్లు, మసాలా దినుసుల మాయాజాలం వల్ల భారతీయ ఆహారానికి అంతర్జాతీయ గుర్తింపు లభిస్తోంది. కేవలం వంటకాలే కాక, కొన్ని భారతీయ నగరాలు కూడా ప్రపంచ స్థాయి గుర్తింపు సాధించాయి. సాధారణంగా ఢిల్లీ చాట్లకు, లక్నో అవధి వంటకాలకు, హైదరాబాద్ బిర్యానీకి పేరుగాంచినా, ఈసారి 'సిటీ ఆఫ్ డ్రీమ్స్' ముంబై అందరి దృష్టినీ ఆకర్షించింది.
టేస్ట్ అట్లాస్ విడుదల చేసిన ప్రపంచంలోని 100 ఉత్తమ ఆహార నగరాలు (Best Food Cities) లిస్టులో ముంబై ఏకంగా 5వ స్థానం దక్కించుకుంది. గత సంవత్సరం కూడా ముంబై ఇదే స్థానంలో ఉంది. ఈ ర్యాంకింగ్స్ను 16,357 ఆహారాలపై వచ్చిన 5,90,228 వెరిఫైడ్ రేటింగ్ల ఆధారంగా నిర్ణయించారు.
100 బెస్ట్ ఫుడ్ సిటీస్: ముంబై అగ్రస్థానం
ముంబైకి 5వ ర్యాంక్ రావడానికి కారణం దాని వంటకాల ఘనత:
1.భేల్ పూరి
2.పావ్ భాజీ
3.వడ పావ్
4.రగ్దా ప్యాటీస్
5.మోదక్
ముంబైతో పాటు చోటు దక్కించుకున్న మరో ఐదు భారతీయ నగరాలు ఇవే: 5వ స్థానంలో ముంబై ఉండగా, 48వ స్థానంలో అమృత్సర్, 53వ స్థానంలో న్యూఢిల్లీ, 54వ స్థానంలో హైదరాబాద్, 73వ స్థానంలో కోల్కతా, 93వ స్థానంలో చెన్నై ఉంది. ప్రపంచంలో అగ్రస్థానంలో ఇటలీ నగరాలు ఉన్నాయి. మొదటి నాలుగు స్థానాలను నేపుల్స్, మిలన్, బోలోగ్నా & ఫ్లోరెన్స్ దక్కించుకున్నాయి.
100 బెస్ట్ వంటకాలు: వంటకాల విషయంలో భారతదేశం నుండి నాలుగు ముఖ్యమైన వంటకాలు లిస్టులో ఉన్నాయి. ఇందులో అత్యంత ప్రజాదరణ పొందిన అమృత్సరి కుల్చా ఏకంగా ప్రపంచంలోనే 17వ స్థానం దక్కించుకుంది. నెయ్యి, కొత్తిమీర, మిరపకాయలతో చేసే ఈ సన్నని, స్ఫుటమైన కుల్చా అమృత్సర్లో కేవలం భోజనం మాత్రమే కాదు, ఒక అనుభవం. లిస్టులో ఇతర భారతీయ వంటకాలు చూస్తే బటర్ చికెన్ 66వ స్థానంలో, హైదరాబాదీ బిర్యానీ 72వ స్థానంలో, షాహి పనీర్ 85వ స్థానంలో ఉన్నాయి.
100 బెస్ట్ ఫుడ్ ప్రాంతాలు: దక్షిణాది అగ్రస్థానం ప్రాంతీయ వంటకాల ర్యాంకింగ్స్లో కూడా భారతదేశం తన ముద్ర వేసింది. నాలుగు భారతీయ ప్రాంతాలు ఈ లిస్టులో ఉన్నాయి. దక్షిణ భారతదేశం 40వ స్థానం, పశ్చిమ బెంగాల్ 73వ స్థానం, మహారాష్ట్ర 76వ స్థానం, కేరళ 97వ స్థానంలో ఉంది.
టేస్ట్ అట్లాస్ హైదరాబాదీ బిర్యానీ, మసాలా దోస, నేతిలి ఫ్రై & కరీమీన్ పొల్లిచతు వంటి ఆహారాలను సిఫార్సు చేస్తుండగా.. దక్షిణ భారతదేశంకు ప్రత్యేక ర్యాంక్ వచ్చిన కేరళ తీరప్రాంత ప్రత్యేకతలు, సుగంధ ద్రవ్యాల చరిత్ర కారణంగా దానికి కూడా ప్రత్యేక గుర్తింపు లభించింది.
ALSO READ : Good Health: కొర్రల ఆహారం.. ఆరోగ్యానికి భేష్.. కొర్ర పులిహార..పకోడి.. సూపర్ టేస్ట్..
100 ఉత్తమ వంటకాలు: ఈ ఏడాది భారతీయ వంటకాలు ప్రపంచంలో 13వ స్థానంలో నిలిచాయి. గత ఏడాదితో పోలిస్తే ఇది కొంచెం తక్కువ. ఈ గైడ్ సిఫార్సు చేసిన తప్పక రుచి చూడవలసిన వంటకాలలో బటర్ గార్లిక్ నాన్, అమృత్సరి కుల్చా, పరోటా, తందూరి చికెన్, ఇంకా కొర్మా ఉన్నాయి. ప్రపంచవ్యాప్తంగా వంటకాల చార్టులలో ఇటలీ, గ్రీస్, పెరూ, పోర్చుగల్, స్పెయిన్ అగ్రస్థానంలో ఉన్నాయి.
ఈ ర్యాంకింగ్లు భారతీయ వంటకాల గురించి ప్రపంచం ఆలోచించే విధానంలో మార్పును చూపిస్తున్నాయి. 'చాలా కారం' అనే అభిప్రాయాలు పోయి, ఇప్పుడు మన ప్రాంతీయ వంటల ప్రత్యేకత, వంట పద్ధతులు, పదార్థాలు, కొత్తదనం గుర్తించబడుతున్నాయి.
