గోదాం కట్టిస్తవా లేదా సారూ..కేటీఆర్ కు రైతు ప్రశ్న

రాజన్నసిరిసిల్ల, వెలుగు: మా ఊరికి గోదాం కట్టిస్తవా లేదా సారూ అంటూ ఓ రైతు కేటీఆర్​ను ప్రశ్నించాడు. రాజన్న సిరిసిల్ల జిల్లా ఎల్లారెడ్డిపేట మండలం నారాయణపూర్​సబ్ స్టేషన్ ​ప్రారంభోత్సానికి మంత్రి కేటీఆర్​ శుక్రవారం వచ్చారు. కేటీఆర్​కోసం రైతులు కూడా వచ్చారు. సబ్​స్టేషన్​ ప్రారంభించినందుకు రైతులు హర్షం వ్యక్తం చేశారు. సత్కరించేందుకు ఓ శాలువాను కూడా తీసుకువచ్చారు. నర్సింహారెడ్డి అనే రైతు అందరి ముందు ‘అయ్యా కేటీఆర్​సారూ.. మీరు అన్ని మంచిగనే చేస్తుండ్రు.. మా ఊరికి సబ్​స్టేషన్​కూడా ఇచ్చిండ్రు,  సంతోషం. కానీ.. మీరు గతంలో మా ఊరి రైతుల కోసం గోదాం నిర్మాణం చేయిస్తనని చెప్పిండ్రు.. కావాలని చేస్తలేరా.. మరిచిపోయిండ్రా’ అని ప్రశ్నించాడు. దాంతో కేటీఆర్​మీ ఊరికి గిన్ని చేసినోళ్లం.. గోదాం నిర్మించి ఇవ్వలేమా.. గత అభివృద్ధికి, నేను వచ్చినంక అభివృద్ధికి తేడా చూడాలే. మీ ఊరికి ఇచ్చిన హామీకి కట్టుబడి ఉన్న అంటూ సమాధానం ఇచ్చారు. అనంతరం నర్సింహారెడ్డి సన్మానించేందుకు శాలువాను తీయగా కేటీఆర్​తిరస్కరించారు. మీ ఊరికి గోదాం కట్టి ఇచ్చాకే నీతోని సన్మానం పొందుతానని అన్నారు. అయ్యా ఏం అనుకోకు.. సబ్​స్టేషన్​ పెట్టినందుకన్న ఈ సన్మానం చేసుకొండ్రి అనగా.. శాలువతో ఆ రైతునే కేటీఆర్​ సత్కరించి వెళ్లిపోయారు.

Latest Updates