- జీఎస్‌‌‌‌టీ కోతతో తయారీ పెంచిన కంపెనీలు
న్యూఢిల్లీ: ఇండియా ఎకానమీ ఈ ఏడాది జులై–సెప్టెంబర్ క్వార్టర్ (క్యూ2) లో అంచనాలకు మించి వృద్ధి చెందింది. జీఎస్‌‌‌‌టీ కోతతో వినియోగం పెరుగుతుందని తయారీ కంపెనీలు భారీగా ప్రొడక్షన్ పెంచాయి. ఫలితంగా గ్రాస్ డొమెస్టిక్ ప్రొడక్ట్ (జీడీపీ) క్యూ2 లో 8.2 శాతం పెరిగింది. ఇది గత ఆరు క్వార్టర్లలో నమోదైన జీడీపీ గ్రోత్ రేట్ కంటే ఎక్కువ. ఈ ఏడాది ఏప్రిల్–జూన్ క్వార్టర్ (క్యూ1) లో జీడీపీ గ్రోత్ రేట్ 7.8 శాతంగా, కిందటేడాది సెప్టెంబర్ క్వార్టర్‌‌‌‌‌‌‌‌లో 5.6 శాతం నమోదైంది.
వాల్యూ పరంగా చూస్తే, క్యూ2లో భారత రియల్ జీడీపీ విలువ రూ.48.63 లక్షల కోట్లుగా నమోదైంది. గత సంవత్సరం ఇదే కాలంలో ఇది రూ.44.94 లక్షల కోట్లుగా ఉంది. అంటే, విలువ పరంగా జీడీపీ సుమారు రూ.3.7 లక్షల కోట్లు పెరిగింది. ఇది 8.2 శాతం వృద్ధికి సమానం. గ్రామీణ ప్రాంతాల్లో వినియోగం, ప్రభుత్వ మూలధన ఖర్చులు భారీగా పెరగడం, ఎక్స్‌‌‌‌పోర్ట్స్ ఊపందుకోవడంతో జీడీపీ గ్రోత్ రేట్ అంచనాలకు మించి నమోదయింది.
పట్టణాల్లో డిమాండ్ తగ్గినా, ప్రైవేట్ కంపెనీల మూలధన ఖర్చులు నెమ్మదించినా ఎకానమీ స్ట్రాంగ్‌‌‌‌గా నిలిచింది. మరోవైపు ఇండియా నామినల్ జీడీపీ క్యూ2లో 8.7 శాతం వృద్ధి చెందింది. నామినల్ జీడీపీ లెక్కల్లో ప్రస్తుత ధరలను పరిగణనలోకి తీసుకుంటారు. స్థిరమైన ధరల వద్ద రియల్ జీడీపీని లెక్కిస్తారు. నామినల్ కంటే రియల్ జీడీపీ డేటాతో నిజమైన ప్రొడక్షన్ గ్రోత్ తెలుస్తుంది.
7 నెలల ఆర్థిక లోటు రూ.8.25 లక్షల కోట్లు
ఈ ఏడాది అక్టోబర్ చివరి నాటికి బడ్జెట్‌‌‌‌లో పెట్టుకున్న ఆర్థిక లోటు అంచనాల్లో 52.6 శాతాన్ని టచ్ చేశామని కేంద్ర ప్రభుత్వం ప్రకటించింది. 2024–25 ఆర్థిక సంవత్సరంలోని మొదటి ఏడు నెలల్లో ఈ నెంబర్ 46.5 శాతంగా నమోదయ్యింది. విలువ పరంగా చూస్తే, ఈ ఏడాది 2025–26 ఆర్థిక సంవత్సరంలో ఏప్రిల్–అక్టోబర్‌‌‌‌‌‌‌‌లో కేంద్ర ప్రభుత్వ ఆర్థిక లోటు రూ.8.25 లక్షల కోట్లుగా ఉంది.
పూర్తి ఆర్థిక సంవత్సరంలో ఆర్థిక లోటు రూ.15.69 లక్షల కోట్లు లేదా జీడీపీలో 4.4 శాతంగా రికార్డవుతుందని బడ్జెట్‌‌‌‌లో అంచనా వేశారు. ప్రభుత్వం చేసే ఖర్చులు, వచ్చే రెవెన్యూ మధ్య తేడాను ఆర్థిక లోటు అంటారు. కంట్రోలర్ జనరల్ ఆఫ్ అకౌంట్స్‌ (సీజీఏ) రిపోర్ట్ ప్రకారం, ఏప్రిల్– అక్టోబర్‌‌‌‌‌‌‌‌లో కేంద్రానికి రూ.18 లక్షల కోట్ల ఆదాయం (బడ్జెట్‌ అంచనాలో 51.5శాతం) వచ్చింది. మొత్తం ఖర్చు రూ.26.25 లక్షల కోట్లు (బడ్జెట్‌ అంచనాలో 51.8శాతం) గా
ఉందని కేంద్రం తెలిపింది.
ప్రభుత్వ పాలసీలతోనే సాధ్యమైంది: మోదీ
ప్రభుత్వం తీసుకున్న పాలసీలు, సంస్కరణలతోనే ఇండియా జీడీపీ అంచనాలకు మించి వృద్ధి చెందిందని ప్రధాని మోదీ ఎక్స్‌‌‌‌లో పోస్ట్ చేశారు. దేశంలోని ప్రతి ఒక్కరి జీవన ప్రమాణాలను మెరుగుపరిచేందుకు మరిన్ని సంస్కరణలు తీసుకొస్తామని అన్నారు. 2047 నాటికి అభివృద్ధి చెందిన దేశంగా ఎదగాలంటే ఇండియా ఎకానమీ ఏడాదికి 8 శాతం (స్థిరమైన ధరల వద్ద) చొప్పున సుమారు 20 ఏళ్ల పాటు వృద్ధి చెందాలని 2024–25 ఎకనామిక్ సర్వే పేర్కొంది. ఇండియా జీడీపీ 2021–22 లో 8.7 శాతం, 2022–23లో 7.2 శాతం వృద్ధి చెందాయి.
