ఈ నెల 20 నుంచి ‘ఇండియా జాయ్’

  • దేశంలోనే అతిపెద్ద డిజిటల్​ఫెస్ట్​కు హైదరాబాద్​ రెడీ
  • మంత్రి కేటీఆర్ వెల్లడి

హైదరాబాద్​, వెలుగు: దేశంలోనే అతిపెద్ద డిజిటల్ ఎంటర్​టైన్మెంట్​ ఫెస్టివల్ ‘ఇండియా జాయ్​’​ ఈసారి కూడా హైదరాబాద్​లోనే జరుగనుంది. రాష్ట్ర ప్రభుత్వ సహకారంతో తెలంగాణ వీఎఫ్‌ఎక్స్‌, యానిమేషన్‌ అండ్‌ గేమింగ్‌ అసోసియేషన్‌ (టీవీఏజీఏ) ఈ ఎక్స్‌పోను నిర్వహిస్తున్నది.  ప్రముఖ మీడియా, ఎంటర్టైన్​మెంట్​, గేమింగ్​, యానిమేషన్​, విజువల్​ ఎఫెక్ట్స్​ రంగాల దిగ్గజ కంపెనీలూ భాగస్వాములుగా పాల్గొనే ‘ఇండియా జాయ్​-2019’ ఎక్స్​పో ఈనెల 20 నుంచి 23 వరకు హైదరాబాద్​ ఇంటర్నేషనల్​ కన్వెన్షన్​ సెంటర్​(హెచ్​ఐసీసీ)లో నిర్వహించనున్నట్లు ఐటీ శాఖ మత్రి కేటీఆర్​ తెలిపారు. ఇండియా జాయ్​ ప్రతినిధులు సోమవారం మంత్రి కేటీఆర్​ను ఆయన ఆఫీసులో కలిశారు.

ఈ సందర్భంగా మంత్రి మాట్లాడుతూ.. మీడియా, డిజిటల్‌ ఎంటర్‌టైన్‌మెంట్‌ రంగాలకు హైదరాబాద్​ను హబ్​గా మార్చాలన్న లక్ష్యంతో పనిచేస్తున్నామని, అందులో భాగంగా సిటీలో ‘ఇమేజ్ టవర్’ను నిర్మించనున్నట్లు చెప్పారు. ఇండియా జాయ్​ ఫెస్ట్​కు 50 దేశాల నుంచి ప్రముఖ కంపెనీలకు చెందిన వెయ్యిమందికిపైగా డెలిగేట్లు హాజరుకానున్నారని, 30 వేల మందికిపైగా సందర్శకులు పాల్గొంటారని తెలిపారు. హైదరాబాద్​లో పెట్టుబడులకు అనువైన అవకాశాలను ఆయా ప్రతినిధులకు వివరిస్తానని కేటీఆర్​ చెప్పారు. . మీడియా, డిజిటల్‌ ఎంటర్‌టైన్‌మెంట్‌ రంగానికి సంబంధించి అవసరమైన మానవ వనరులన్నీ హైదరాబాద్​లో అందుబాటులో ఉన్నాయని, ఇప్పటికే అంతర్జాతీయంగా అత్యంత ప్రజాదరణ పొందిన సినిమాలకు, చోటా భీమ్ లాంటి కార్టూన్ సిరీస్​కు హైదరాబాద్​లోనే రూపకల్పన జరిగిందని గుర్తుచేశారు. ఈ రెండు రంగాల్లో పెట్టుబడులు పెట్టాలనుకునేవాళ్లకు ప్రభుత్వం తరఫున పూర్తిగా సహకరిస్తామన్నారు.

హైదరాబాద్​లో ఉన్న టాలెంట్​ను ప్రదర్శించడానికి ఇండియాజాయ్​ చక్కటి వేదిక అని, ఇందులో  ఇండియా గేమ్ డెవలపర్ కాన్ఫరెన్స్, దేశీ టూన్స్, విఎఫ్ఎక్స్ సదస్సు సహా 10 రకాల ఈవెంట్లు జరుగుతాయని మంత్రి కేటీఆర్​ చెప్పారు. గతేడాది డిసెంబర్​లో నిర్వహించిన ఇండియాజాయ్​-2018లో 30 దేశాల నుంచి దాదాపు 500 మంది డెలిగేట్లు హాజరుకాగా, ఈసారి రెట్టింపు సంఖ్యలో వస్తుండటం గమనార్హం.

Latest Updates