సేనాధిపతి అవసరమే!

ఆర్మీ, నేవీ, ఎయిర్​ఫోర్స్ మూడింటి మధ్య మరింత కో–ఆర్డినేషన్​ కోసం సీనియర్​ చీఫ్​ని  తీసుకురావాలన్నది దాదాపు 20 ఏళ్ల నాటి ఆలోచన. కార్గిల్​ యుద్ధం అయిపోగానే సాయుధ బలగాల మధ్య సమన్వయం ఉండాలన్న సూచన వచ్చింది. ఆ పోస్టుకు ‘చీఫ్​ ఆఫ్​ డిఫెన్స్​ స్టాఫ్​’(సీడీఎస్​) అనే పేరు కూడా పెట్టారు. ఆ తర్వాత పొలిటికల్​ ఈక్వేషన్లు మారడంతో ఈ ప్రపోజల్​ తెర వెనక్కి పోయింది. ఇండియాతో యుద్ధానికి పాకిస్థాన్​ కాలుదువ్వుతున్న నేపథ్యంలో కేంద్రం తీసుకున్న ఈ నిర్ణయానికి ప్రాధాన్యత ఏర్పడింది.

ఇండియా లాంటి పెద్ద ప్రజాస్వామ్య దేశంలో డిఫెన్స్​ విభాగం మూడు ముక్కలుగా పనిచేస్తుంది. 1971 తర్వాత ఇండియా అడపాదడపా పీస్​ కీపింగ్​ ఆపరేషన్లలో పాల్గొనడం తప్ప.. యుద్ధ వాతావరణాన్ని ఎదుర్కొనలేదు. 1999 వేసవి కాలం(వాజ్​పేయి హయాం)లో మే నుంచి జూలై వరకు మూడు నెలలపాటు కార్గిల్​లో యుద్ధం జరిగింది. మనవాళ్లు 527 మంది చనిపోగా, 1,363 మంది గాయపడ్డారు. పాక్​ తరఫున 453 హతమవగా, 665 మందే గాయాల పాలయ్యారు. మృతుల సంఖ్యలోనూ, క్షతగాత్రుల సంఖ్యలోనూ ఇండియాకే ఎక్కువ నష్టం జరిగింది. వార్​ ముగిశాక ఏర్పడిన కార్గిల్​ రివ్యూ కమిటీ (కేఆర్​సీ) కొన్ని సూచనలు చేసింది. నేషనల్​ సెక్యూరిటీ మేనేజ్​మెంట్​ను పూర్తిగా మార్చేయాలని సూచించింది. సెక్యూరిటీకి సంబంధించి నిర్ణయాలు తీసుకునే తీరును, హైలెవల్​ సిస్టమ్​ను చక్కదిద్దాలనే అభిప్రాయం వ్యక్తం చేసింది. డిఫెన్స్​ మినిస్ట్రీకి, ఆర్మ్​డ్ ఫోర్సెస్​ హెడ్ ​క్వార్టర్స్​కి నడుమ మధ్యవర్తిత్వాన్ని కూడా సరిచేయాలని సలహా ఇచ్చింది. ఈ బాధ్యతలను నెరవేర్చే ఆఫీసర్​కి ‘చీఫ్​ ఆఫ్​ డిఫెన్స్​ స్టాఫ్ ​(సీడీఎస్​)​’ అనే పేరు పెట్టాలని మాత్రం డైరెక్ట్​గా చెప్పలేదు.

కేఆర్​సీ ఈ రికమండేషన్లు ఇవ్వటానికి బలమైన కారణం ఉంది. కార్గిల్​ వార్​లో పాకిస్థాన్​పై మన దేశం గెలిచింది. కానీ.. ఆ యుద్ధానికి ముందు ఆర్మీ, నేవీ, ఎయిర్​ఫోర్స్​ మధ్య కో–ఆర్డినేషన్​ చాలా పూర్​గా ఉండేదని కేఆర్​సీ గుర్తు చేసింది. ఫ్యూచర్​లో ఇలాంటి పరిస్థితి రాకుండా చూడాలని సెంట్రల్​ గవర్నమెంట్​ని కోరింది. కేంద్ర ప్రభుత్వ స్థాయిలో ఆర్మ్​డ్​ ఫోర్స్​లు భాగం కాకపోవటం పెద్ద పెద్ద ప్రజాస్వామ్య దేశాల్లో ఎక్కడా లేదని, ఇండియా వంటి మేజర్​ డెమొక్రసీలో ఈ లోటు స్పష్టంగా కనిపిస్తోందని కేఆర్​సీ ప్రత్యేకంగా పేర్కొంది.

ముందుచూపు ముఖ్యం

ఆర్మీ, నేవీ, ఎయిర్​ఫోర్స్​ చీఫ్​లు ఎక్కువ సమయాన్ని ఆపరేషనల్​ రోల్స్​కే కేటాయిస్తారని, సెక్యూరిటీపై తుది నిర్ణయాలు తీసుకునేటప్పుడు సర్కారులో పాలుపంచుకోరని కార్గిల్​ రివ్యూ కమిటీ తప్పుపట్టింది. దీనివల్ల చాలా సార్లు నెగెటివ్​ రిజల్ట్స్​ వచ్చాయని తన రిపోర్ట్​లో మొహమాటం లేకుండా తెలిపింది. సెక్యూరిటీకి సంబంధించి డే–టు–డే ప్రయారిటీల కారణంగా లాంగ్ ​టర్మ్ ప్లానింగ్​ తీవ్రంగా దెబ్బతింటోందని వివరించింది. హైలెవల్​ డిఫెన్స్​ మేనేజ్​మెంట్​ నిర్ణయాలు బ్రాడ్​బేస్డ్​గా, ఏకాభిప్రాయం కలిగి ఉండాలని తేల్చిచెప్పింది.

కేఆర్​సీ తన రిపోర్ట్​ను కేంద్రానికి ఇచ్చిన తర్వాత అందులోని రికమండేషన్లను మినిస్టర్ల టాస్క్​ఫోర్స్​ లోతుగా స్టడీ చేసింది. చీఫ్​ ఆఫ్​ డిఫెన్స్​ స్టాఫ్​ (సీడీఎస్​) ఉండాల్సిందేనని, అతనికి ‘ఫైవ్​ స్టార్​ ఆఫీసర్’ హోదా ఇవ్వాలని ‘కేబినెట్​ కమిటీ ఆన్​ సెక్యూరిటీ’కి ప్రపోజ్​ చేసింది. సీడీఎస్​ పోస్టును క్రియేట్​ చేసే క్రమంలో నాటి ఎన్​డీఏ గవర్నమెంట్ 2002లో ఇంటిగ్రేటెడ్​ డిఫెన్స్​ స్టాఫ్​(ఐడీఎస్​)కు రూపకల్పన చేసింది. ఇది చేయాల్సిన పనులు కూడా చివరికి సీడీఎస్​ సెక్రటేరియట్​ మాదిరిగానే ఉండనున్నాయనే టాక్​ వినిపించింది.

ఇన్నాళ్లూ ఎందుకు నియమించలేదు?

మన దేశంలో బ్రిటిషర్ల కాలం నుంచీ ‘చీఫ్స్​ ఆఫ్​ స్టాఫ్​ కమిటీ (సీఓఎస్సీ)’ చైర్మన్​ పోస్టు ఉంది. కానీ అతనికి అధికారాలు పెద్దగా ఇవ్వలేదు. అప్పుడప్పుడు కాస్తో కూస్తో మార్పులు చేర్పులు చేస్తూ కొనసాగిస్తున్నారు. ఆర్మీ, నేవీ, ఎయిర్​ఫోర్స్​లలో సీనియర్​ మోస్ట్​ని సీఓఎస్సీకి హెడ్​గా నియమిస్తుంటారు. ప్రస్తుతం ఆ పోస్టులో ఎయిర్​ చీఫ్​ మార్షల్​ బీరేందర్​సింగ్​ ధనోవా ఉన్నారు. ఈయన పదవీ కాలం ఈ నెలతో ముగుస్తుంది. మూడు సర్వీసుల మధ్య కో–ఆర్డినేషన్​ పెంచటంలో సీఓఎస్సీ విఫలమవుతోందని 2015లో అప్పటి రక్షణ మంత్రి మనోహర్​ పారికర్ అసంతృప్తి వ్యక్తం చేశారు. దీనికి కేటాయిస్తున్న బడ్జెట్​ను ప్రభుత్వం రాన్రానూ అనవసర భారం అనుకుంటోంది. దేశానికి పవర్​ఫుల్​ మిలటరీ లీడర్​ ఉండాలనే విషయంలో పొలిటికల్​ పార్టీల మధ్య ఏకాభిప్రాయం లేదు. అందువల్లనే సీఓఎస్సీ పోస్టును అప్​గ్రేడ్​ చేయలేదు. ఆ లోటును భర్తీ చేయటానికి మోడీ సర్కారు ప్రయత్నాలు ప్రారంభించింది. మనపై యుద్ధానికి పాకిస్థాన్​ కాలుదువ్వుతుండటంతో సీడీఎస్​ తప్పనిసరి అనే నిర్ణయానికి వచ్చింది.

మన ప్రధానికి మిలటరీ అడ్వైజర్​ ఎవరు?

నేషనల్​ సెక్యూరిటీ అడ్వైజరే (ఎన్​ఎస్​ఏ) ఇప్పుడు మన ప్రధానికి సైనిక సలహాదారు. 2018లో కొత్తగా డిఫెన్స్​ ప్లానింగ్​ కమిటీని ఏర్పాటుచేయటంతో ఎన్​ఎస్​ఏ పోస్టుకి ప్రత్యేకత వచ్చింది. ప్రస్తుతం దీనికి చైర్మన్​గా అజిత్​ ధోవల్​ వ్యవహరిస్తున్నారు. ఫారిన్​, డిఫెన్స్​, ఎక్స్​పెండిచర్​ సెక్రెటరీలు; ఆర్మీ, నేవీ, ఎయిర్​ఫోర్స్​ సర్వీసుల చీఫ్​లు ఆ కమిటీలో మెంబర్లుగా ఉన్నారు.

ర్యాంకుల్లోనూ తేడాలే!

ఇండియన్​ నేవీ, ఎయిర్​ఫోర్స్​, ఆర్మీ  మూడింటిలోనూ పది ర్యాంకులు ఉన్నప్పటికీ.. మూడు విభాగాల్లోనూ ఒకే రకమైన ర్యాంకులు కూడా ఉండవు. ఉదాహరణకు, లెఫ్టినెంట్​ అనేది ఇండియన్​ ఆర్మీలో పదో ర్యాంక్​, ఇండియన్​ నేవీలో తొమ్మిదో ర్యాంక్​. ఆర్మీలో తొమ్మిదో ర్యాంకయిన కెప్టెన్​ హోదా నేవీలో ఆరో ర్యాంక్​. అలాగే, రిటైరయ్యాక వచ్చే పెన్షన్​ బెనిఫిట్స్​ కూడా మూడింటిలోనూ ఒకే తీరుగా ఉండవు. ఈ తేడాని నరేంద్ర మోడీ సర్కారు ఫస్ట్​ ఫేజ్​లోనే సరిదిద్దాలని అనుకుంది. ‘ఒకే ర్యాంక్​, ఒకే పింఛన్​’ స్కీమ్​ని ప్రవేశపెట్టాలన్నా సాధ్యపడలేదు. ఎన్డీయే ప్రభుత్వం ఈ స్కీమ్ ​కోసం 5,500 కోట్ల రూపాయలు విడుదల చేసింది గానీ,  రిటైర్డ్​ సిబ్బంది నుంచి అనేక అభ్యంతరాలు రావడంతో అమలు కావడం లేదు. ఇవన్నీ పరిష్కరించి ఒక యూనిఫాం వ్యవస్థను ఏర్పరచాలన్నది మోడీ ప్రభుత్వ ఉద్దేశం.

సీడీఎస్​ ఎందుకు?

సీడీఎస్ అనేది హై మిలటరీ ఆఫీస్​లా వ్యవహరిస్తుంది. ఆర్మీ, నేవీ, ఎయిర్​ఫోర్స్​ల పనితీరును పర్యవేక్షించటం; ఆ  మూడింటి మధ్య సమన్వయం కుదర్చటం; వాటిని ఎప్పటికప్పుడు అలర్ట్​ చేయటం; లాంగ్​ టర్మ్​ డిఫెన్స్​ ప్లానింగ్​, మేనేజ్​మెంట్​కి సంబంధించి ప్రధానికి నేరుగా సింగిల్​ పాయింట్​ అడ్వైజ్​ ఇవ్వటం దీని​​ ముఖ్యమైన పనులు. సెక్యూరిటీ మ్యాన్ ​పవర్, ఎక్విప్​మెంట్​, స్ట్రాటజీలతోపాటు బలగాల ఆపరేషన్స్​ విషయంలో ఉమ్మడి బాధ్యత తీసుకుంటుంది. సీడీఎస్​ ఆఫీసర్​ ఎంత అవసరమో యుద్ధ సమయాల్లో తెలుస్తుంది. మిలటరీకి సంబంధించి అడ్వాన్స్​గా ఉండే చాలా ప్రజాస్వామ్య దేశాల్లో ఈ వ్యవస్థ ఇప్పటికే ఉంది. కాకపోతే ఆయా చోట్ల​ అధికారాల్లో​ కొద్దో గొప్పో మార్పులుంటాయి. అమెరికాలోని ‘జాయింట్​ చీఫ్స్ ఆఫ్​ స్టాఫ్​ కమిటీ (జేసీఎస్సీ)’ చైర్మన్​ చాలా పవర్​ఫుల్​. ఈ మోస్ట్​ సీనియర్​ మిలటరీ ఆఫీసరే​ ప్రెసిడెంట్​కి మిలటరీ అడ్వైజర్​. అతను నేషనల్​ సెక్యూరిటీ కౌన్సిల్​, హోమ్​ ల్యాండ్​ సెక్యూరిటీ కౌన్సిల్​, డిఫెన్స్​ సెక్రెటరీల నిర్ణయాల్లోనూ నేరుగా జోక్యం చేసుకోగలడు. ఆర్మీ, నేవీ, ఎయిర్​ఫోర్స్​, మెరైన్​ కార్ప్స్​, నేషనల్​ గార్డ్​ల చీఫ్​లూ ఈ జీసీఎ​స్సీలో మెంబర్లుగా ఉంటారు.

Latest Updates