గంగుల పాచిక పారలేదా?

కరీంనగర్, వెలుగు: తన అనుచరుడిని కరీంనగర్​ మేయర్​ చేద్దామనుకున్న మంత్రి గంగుల కమలాకర్​కు చివరి నిమిషంలో చుక్కెదురైంది. మాజీ ఎంపీ, రాష్ట్ర ప్రణాళిక సంఘం ఉపాధ్యక్షుడు బి వినోద్​కుమార్​చక్రం తిప్పడంతో యాదగిరి సునీల్​రావుకు పీఠం దక్కింది. తెర వెనుక పెద్ద కథే నడిచినట్లు తెలుస్తోంది. మరోసారి మేయర్​ అవుదామని కలలుగని హైకమాండ్​చుట్టూ చక్కర్లు కొట్టిన మాజీ మేయర్​రవీందర్​సింగ్​కూ మొండిచెయ్యే మిగిలింది.

వెలమకే ఇవ్వాలని..

కరీంనగర్  మేయర్ స్థానం ఈ సారి జనరల్​అయింది. దీంతో జిల్లాలో బలమైన వెలమ సామాజికవర్గానికే పీఠం దక్కేలా టీఆర్​ఎస్ లీడర్లు మొదటి నుంచీ పావులు కదిపారు. సదరు సామాజికవర్గం కోరుకున్నట్లే మంత్రి గంగుల కమలాకర్, తన అనుచరుడు వంగెపల్లి రాజేందర్ రావు పేరును తెరపైకి తెచ్చారు. కాంట్రాక్టులు, వ్యాపారాలు చేసుకునే ఆయనను ఒప్పించి, టికెట్​ఇప్పించి మరీ గెలిపించుకున్నారు. రాజేందర్​రావును మేయర్ అభ్యర్థిగా ప్రకటించకపోయిన్నప్పటికీ మంత్రి గంగుల కమలాకర్​ ప్రత్యేక శ్రద్ధ చూపుతుండడంతో ఆయనే మేయర్​అవుతారని పార్టీ కేడర్​ భావించింది. రిజల్ట్స్​ వెలువడ్డాక పరిస్థితి మారింది. కరీంనగర్​లో కనీసం 40 సీట్లకు పైగా పార్టీ గెలుచుకుంటుందని ఆశించిన హైకమాండ్​కు చివరకు నిరాశే మిగిలింది. దీనిని గుర్తించిన మంత్రి గంగుల కమలాకర్ ఇండిపెండెంట్లుగా గెలిచిన ఏడుగురిని కూడా కేటీఆర్ సమక్షంలో టీఆర్​ఎస్​లో చేర్పించారు. అయినప్పటికీ మేయర్​ విషయంలో మంత్రి మాట చెల్లలేదు. ఇటీవల కొత్తపల్లి మున్సిపాలిటీలోనూ సీనియర్ నాయకుడు వాసాల రమేశ్‍ను చైర్మన్​ చేయాలని మంత్రి ఆశించినా చివరి నిమిషంలో హైకమాండ్​ సూచించిన రుద్రరాజు చైర్మన్​ అయ్యారు.

వినోద్ కుమార్ ఎంట్రీతో మారిన సీన్​..

రిజల్ట్స్​తర్వాత కార్పొరేటర్లంతా క్యాంపుకి వెళ్లారు. మాజీ మేయర్​ రవీందర్ సింగ్ మాత్రం హైకమాండ్​ ఆశీస్సుల కోసం తిరిగారు. రాజేందర్ రావు మంత్రిని నమ్ముకోగా, సునీల్ రావు ప్రణాళిక సంఘం రాష్ట్ర  ఉపాధ్యక్షుడు, మాజీ ఎంపీ వినోద్ కుమార్ , రాజ్యసభ సభ్యుడు  సంతోష్ కుమార్​తో టచ్​లో ఉంటూ వచ్చారు. కేసీఆర్ కుటుంబ సభ్యుడైన వినోద్ కుమార్ సునీల్ రావుకు మేయర్ పీఠం దక్కేలా తీవ్ర కృషి చేసి, సక్సెస్​ అయ్యారు. సునీల్ రావు మేయర్​ కావడంతో ఆ పదవిపై ఆశతో పోటీచేసిన రాజేందర్ రావు తీవ్ర నిరాశకు లోనయ్యారు. బుధవారం జరిగిన పదవీ ప్రమాణ స్వీకార కార్యక్రమానికి హాజరైనప్పటికీ  ఓ మూలన దిగాలుగా కూర్చొని కనిపించారు. మరోవైపు నిన్నటి దాకా మేయర్​ సీట్లో కూర్చున్న రవీందర్​సింగ్​ఇప్పుడు మామూలు కార్పొరేటర్​​గా మిగిలిపోయారు.