కామారెడ్డి జిల్లాలో మెడికల్​కాలేజీ పనులు కంప్లీట్​కాలే

• త్వరలోనే సీట్ల కేటాయింపు పూర్తి
• వచ్చే నెలలోనే ప్రారంభం కానున్న క్లాసులు
• ఇంకా ఎక్కడికక్కడే ఉన్న పనులు
• ఉన్నతాధికారులు చొరవ చూపితేనే పనులు పూర్తి 

కామారెడ్డి, వెలుగు : కామారెడ్డి జిల్లా కేంద్రంలో ఈ ఏడాది మెడికల్​ప్రారంభం కానుండగా, పర్మినెంట్ ​బిల్డింగ్​నిర్మించే వరకు కాలేజీని మాతా శిశు సంరక్షణ హాస్పిటల్​ కోసం నిర్మిస్తున్న బిల్డింగ్​లో నిర్వహించాలని, కాలేజీ అనుబంధ హాస్పిటల్​ను జిల్లా హాస్పిటల్​లో కొనసాగించాలని నిర్ణయించారు. ఇందుకనుగుణంగా మార్పులు చేస్తున్నారు. నెలరోజుల్లో తరగతులు ప్రారంభం కానుండగా, ఆయా చోట్ల కొనసాగుతున్న పనులు నత్తనడకన సాగుతున్నాయి. మెడికల్​కాలేజీకి కేటాయించిన మాతా శిశు సంరక్షణ హాస్పిటల్​రెండో అంతస్తులో అదనపు గదులు నిర్మిస్తున్నారు.

 ఇక్కడే అడ్మినిస్ట్రేషన్​ బ్లాక్, ప్రాక్టికల్​ రూమ్స్, పక్కనే లెక్చర్​ హాల్స్​ ఏర్పాటు చేస్తున్నారు. ఈ పనులు స్లోగా సాగుతున్నాయి. బిల్డింగ్​కు కలరింగ్​ వేయాల్సి ఉంది. ల్యాబ్స్, లైబ్రరీ రూమ్స్​ పూర్తికాలేదు. ఇంకా ఫర్మిచర్​ రాలేదు. అడ్మిషన్లు షూరు కావడం, మరో వైపు క్లాసుల గడువు కూడా దగ్గర పడుతున్న దృష్ట్యా నిర్మాణ పనులపై ఆఫీసర్లు ఇప్పుడు హడావుడి చేస్తున్నారు. ఉన్నతాధికారులు ప్రత్యేకంగా చొరవ తీసుకుంటేగానీ పనులు త్వరగా కంప్లీటయ్యే పరిస్థితి కనిపించడం లేదు.

అనుబంధ హాస్పిటల్​లో కోసం..

మెడికల్ ​కాలేజీ కి సంబంధించిన అనుబంధ హాస్పిటల్​ను జిల్లా ఆసుపత్రిలో కొనసాగించాలని నిర్ణయించారు.  ఇక్కడ 200 బెడ్లు ఉన్నాయి. స్థలం ఇరుకుగా ఉండడంతో సెకండ్​ ఫ్లోర్​పై తాత్కాలికంగా రేకుల షెడ్లు వేశారు. ఈ పనులు ఇంకా కంప్లీట్​ కాలేదు. గోడలు, రేకులు మాత్రమే వేశారు. ఇంకా సీలింగ్​పనులు చేయాల్సి ఉంది. 

వచ్చే నెలలోనే క్లాసులు షురూ..

వచ్చే నెలలోనే క్లాసులు షురూ కానున్నాయి. ఇప్పటికే ఆలిండియా కోటా కౌన్సిలింగ్​లో స్టూడెంట్స్​కేటాయింపు పూర్తయింది. వేరే రాష్ట్రానికి చెందిన ఓ స్టూడెంట్​వచ్చి అడ్మిషన్​ కూడా తీసుకున్నాడు. స్టేట్​స్టూడెంట్స్​కౌన్సిలింగ్ ​ప్రక్రియ మరికొద్ది రోజుల్లో జరగనుంది. కాలేజీలో ఇప్పటికే 10 మంది ప్రొఫెసర్లు, 24 మంది అసిస్టెంట్​ ప్రొఫెసర్లు, 8 మంది అసోసియేట్ ​ప్రొఫెసర్లు డ్యూటీలో చేరారు. ఆఫీస్​స్టాఫ్​కూడా కొందరు వచ్చారు. 

స్టూడెంట్స్​వచ్చే వరకు  రెడీ చేస్తాం

స్టూడెంట్స్​ వచ్చే వరకు కాలేజీ బిల్డింగ్, హాస్పిటల్​మొత్తం రెడీగా ఉంటుంది. కాలేజీ బిల్డింగ్​లో చాలా వరకు పనులు కంప్లీటయ్యాయి. లెక్చర్​హాల్ పనులు కూడా కంప్లీట​వుతాయి. హాస్పిటల్​లోనూ పనులు కొనసాగుతున్నాయి. స్టూడెంట్స్​కు ఎలాంటి ఇబ్బందులు లేకుండా చూస్తాం.

-  డాక్టర్ ​వెంకటేశ్వర్లు, కాలేజీ ప్రిన్సిపల్​