బెంగళూరు: కరోనాతో చనిపోవడంతో డెడ్బాడీని అప్పగించలే.. అంత్యక్రియలు మేమే చేస్తమని చెప్పి చివరిసారి డెడ్బాడీని చూపించి, పంపేసిన్రు. రోజూ వార్తలల్ల చూస్తూనే ఉన్నరు కాబట్టి మృతుడి బంధువులూ మాట్లాడలే. ఆస్పత్రి వర్గాలే దహనం చేసిన్రని అనుకున్నరు. దాదాపు ఏడాదిన్నర గడిచింది. ఇప్పుడిప్పుడే ఆ బాధనుంచి తేరుకుంటున్న వాళ్లకు ఆస్పత్రి వర్గాలు గుండె పగిలే వార్త చెప్పాయి. కిందటేడాది చనిపోయిన వాళ్ల బంధువు డెడ్బాడీ ఇప్పటికీ మార్చురీలోనే ఉందని సమాచారం అందించాయి. బెంగళూరులో చోటుచేసుకున్న ఈ ఘటన రెండు కుటుంబాల్లో తీవ్ర ఆవేదనను నింపింది.
ఏం జరిగిందంటే..
బెంగళూరుకు చెందిన దుర్గా సుమిత్ర(40), మునిరాజు(50) కిందటేడాది జులై 2న కరోనాతో చనిపోయారు. ఫస్ట్వేవ్ తీవ్రత తగ్గినా మరోసారి కేసులు పెరుగుతూ రెండో వేవ్ వస్తుందని జనం ఆందోళన చెందుతున్న టైమది. సిటీలోని రాజాజీనగర్ మోడల్ హాస్పిటల్లో మునిరాజు, ఈఎస్ఐ ఆస్పత్రిలో సుమిత్ర చనిపోయారు. కరోనా మరణం కాబట్టి డెడ్బాడీని అప్పగించలేమని డాక్టర్లు చెప్పారు. వైరస్ వ్యాప్తిని అరికట్టే చర్యల్లో భాగంగా అంత్యక్రియల వ్యవహారం తామే చూసుకుంటామని అన్నారు. చేసేదేంలేక సుమిత్ర, మునిరాజు కుటుంబ సభ్యులు డెడ్బాడీలను చివరిసారి చూసి, తుది వీడ్కోలు పలికారు. ఇంటికి వెళ్లాక శాస్త్రప్రకారం మిగతా విధులు నిర్వహించారు. రోజులు, నెలలు గడిచి, ఏడాది పూర్తైంది. సుమారు ఏడాదిన్నర అయినంక ఇప్పడు సుమిత్ర, మునిరాజు డెడ్బాడీలు ఇంకా మార్చురీలోనే ఉన్నాయని వాళ్ల కుటుంబ సభ్యులకు ఫోన్ వచ్చింది. దీంతో షాక్ అయిన కుటుంబ సభ్యులు వెంటనే ఆస్పత్రికి పరుగులు పెట్టారు. మార్చురీలో కుళ్లిన స్థితిలో తమ వాళ్ల డెడ్బాడీలను చూసి తీవ్ర ఆవేదనకు లోనయ్యారు.
ఎట్లా గుర్తించిన్రు..
మార్చురీని క్లీన్ చేసేటపుడు కుళ్లిపోయిన స్థితిలో ఉన్న డెడ్ బాడీలను హౌస్కీపింగ్ స్టాఫ్ గుర్తించారు. వెంటనే ఉన్నతాధికారులకు సమాచారం అందించడంతో వాళ్లు అలర్ట్ అయ్యారు. డెడ్బాడీలను పరిశీలించి, అవి సుమిత్ర, మునిరాజులకు చెందినవని నిర్ధారించారు. కిందటేడాది నుంచి అవి అక్కడే ఉండిపోవడానికి కారణమేంటనేది గుర్తించేందుకు విచారణకు ఆదేశించామని, నిర్లక్ష్యం ప్రదర్శించిన సిబ్బందిని సస్పెండ్ చేశామని ఉన్నతాధికారులు తెలిపారు. మృతదేహాలకు పోస్ట్మార్టం చేసి, లీగల్ ఫార్మాలిటీలు పూర్తిచేసి బంధువులకు
అప్పగిస్తామని చెప్పారు.
