ఉమ్మడి ఆదిలాబాద్ జిల్లాలో చివరి రోజు జోరుగా నామినేషన్లు

• అర్ధరాత్రి వరకు సాగిన ప్రక్రియ
• తొలి విడత నామినేషన్లు పూర్తి
• సర్పంచ్ పదవికి ట్రాన్స్​జెండర్ సాధన నామినేషన్
• నేటి నుంచి రెండో విడత నామినేషన్ల స్వీకరణ

ఆసిఫాబాద్/మంచిర్యాల, వెలుగు: తొలి విడత పంచాయతీ ఎన్నికలకు ఉమ్మడి ఆదిలాబాద్ జిల్లాలో నామినేషన్లు భారీ సంఖ్యలో వచ్చాయి. సర్పంచ్, వార్డు మెంబర్​ స్థానాలకు పోటీ చేసే అభ్యర్థ్యులు చివరి రోజైన శనివారం నామినేషన్​వేసేందుకు క్లస్టర్​ కేంద్రాలకు పోటెత్తారు. కేంద్రాల వద్ద బారులుతీరారు. దీంతో అధికారులు అర్ధరాత్రి వరకు నామినేషన్లు తీసుకున్నారు. అధికారులు ఈ నెల 27 నుంచి నామినేషన్లు స్వీకరిస్తుండగా గురు, శుక్రవారాల్లో నామమాత్రంగా నామినేషన్లు దాఖలయ్యాయి. 

చివరి రోజు మాత్రం భారీగా నామినేషన్లు వచ్చాయి. మొదటి రెండు రోజుల్లో సర్పంచ్, వార్డ్ మెంబర్ స్థానాలకు ఏకగ్రీవం కోసం చర్చలు జరిపారు. పలుచోట్ల అవి విఫలం కావడంతో శనివారం పార్టీల వారీగా అభ్యర్థులు నామినేషన్లు వేశారు. సాయంత్రం 5 గంటల లోపు వచ్చిన వారికి మాత్రమే అధికారులు టోకెన్లు జారీ చేసి లోపలికి అనుమతించారు. అప్పటికే అభ్యర్థులు భారీ సంఖ్యలో ఉండడంతో వారి నామినేషన్ల స్వీకరణ అర్ధరాత్రి వరకు సాగింది. 

డిసెంబర్​ 3 వరకు ఉపసంహరణ గడువు

స్వీకరించిన నామినేషన్లను ఆదివారం పరిశీంచేందుకు అధికారులు ఏర్పాట్లు పూర్తి చేశారు. సాయంత్రం 5 గంటల తర్వాత  స్క్రూటినీ పూర్తిచేసి, చెల్లుబాటయ్యే అభ్యర్థుల లిస్ట్​ రెడీ చేస్తారు. నామినేషన్‌ తిరస్కరణకు గురైతే డిసెంబర్​1 సాయంత్రం వరకు అప్పీల్ చేసుకునే అవకాశం కల్పించారు. డిసెంబర్​3న మధ్యాహ్నం3 గంటల వరకు నామినేషన్ల ఉపసంహరణకు గడువు ఉంది. అదేరోజు మధ్యాహ్యం 3 గంటల తర్వాత బరిలో ఉన్న అభ్యర్థుల తుది జాబితాను ఎన్నికల అధికారులు ప్రకటిస్తారు.

నామినేషన్ దాఖలు చేసిన ట్రాన్స్​జెండర్

ఆసిఫాబాద్ జిల్లా జైనూర్ మండలంలోని మార్లవాయి గ్రామపంచాయతీ సర్పంచ్ పదవికి ట్రాన్స్‌జెండర్ సాధన జైనూర్ క్లస్టర్ కార్యాలయంలో నామినేషన్ దాఖలు చేశారు. జైనూర్, సిర్పూర్ (యు), లింగాపూర్ మండలాల్లో ట్రాన్స్​జెండర్ హక్కుల కోసం ఆమె పోరాడుతున్నారు. ట్రాన్స్​జెండర్లు కూడా ప్రజాప్రతినిధులుగా నిలబడి సమాజ సేవ చేయగలరని నిరూపించేందుకు పోటీ చేస్తున్నానని చెప్పారు. లింగాపూర్ మండలం కంచన్​పల్లి గ్రామపంచాయతీ ఎస్టీ మహిళకు రిజర్వ్​కాగా అందరూ చర్చించుకొని కనక పార్వతిని సర్పంచ్ అభ్యర్థిగా నిర్ణయించారు. 

ఆమె మాత్రమే నామినేషన్ దాఖలు చేయడంతో ఆ స్థానం ఏకగ్రీమైంది. పలు చోట్ల కుటుంబసభ్యులే సర్పంచ్ పదవి కోసం ప్రత్యర్థులుగా ఎన్నికల రంగంలో దిగారు. ఆదిలాబాద్ జిల్లా ఇంద్రవెల్లి మండలంలోని ఏమాయికుంట గ్రామానికి చెందిన అన్నదమ్ములు నామినేషన్లు దాఖలు చేశారు. మండలంలోని హీరాపూర్ గ్రామానికి చెందిన తొడసం లక్ష్మి బాయి, ఆమె కోడలు మహేశ్వరి సర్పంచ్ సర్పంచ్ పదవికి నామినేషన్లు వేశారు.

నేటి నుంచి రెండో విడత నామినేషన్లు షురూ..

రెండో విడత సర్పంచ్, వార్డు స్థానాలకు ఆదివారం నుంచి నామినేషన్లు స్వీకరించనున్నారు. ఈ ప్రక్రియ డిసెంబర్ 2 వరకు కొనసాగుతుంది. 3వ తేదీన నామినేషన్లు పరిశీలించి  6న ఉపసంహరణకు గడువు విధించారు. డిసెంబర్ 14 ఉదయం 7 గంటల నుంచి మధ్యాహ్నం ఒంటి గంట వరకు ఆయా మండలాల్లో ఎన్నికలు నిర్వహించి, మధ్యాహ్నం 2 గంటల తర్వాత ఓట్లు లెక్కించి ఫలితాలు వెల్లడించనున్నారు.