హైదరాబాద్: ఐ బొమ్మ రవి మూడవ రోజు కస్టడీ విచారణ ముగిసింది. ఐ బొమ్మ రవిని సైబర్ క్రైమ్ పోలీస్ స్టేషన్ నుంచి నాంపల్లి కోర్టుకు సైబర్ క్రైమ్ పోలీసులు తరలించారు. ఐ బొమ్మ పేరును.. రవి ఇంటి పేరు ఇమ్మది అని.. అందువల్ల iBOMMA అని పెట్టాడని అంతా అనుకున్నారు. కానీ.. ఈ ప్రచారంలో నిజం లేదని తేలిపోయింది. iBOMMA అంటే ఇమ్మంది బొమ్మ కాదు.. ఇంటర్నెట్ బొమ్మ అనే అర్థంలో పేరు పెట్టినట్లు విచారణలో రవి చెప్పుకొచ్చాడు.
సినిమాను ఒక్కో ఏరియాలో ఒక్కోలా పిలుస్తారు. తెలంగాణలో సైన్మా అని.. ఆంధ్రాలో కొన్ని ఏరియాల్లో ఆట అని.. విశాఖ ఏరియాలో సినిమాను బొమ్మ అని పిలుస్తుంటారు. ఇమ్మంది రవి సొంతూరు విశాఖపట్నం. విశాఖ ప్రాంతంలో సినిమాను బొమ్మ అని అంటుంటారు. ఇంటర్నెట్లో చూపించే బొమ్మ అనే ఆలోచనతో ఐబొమ్మ అని రవి తన పైరసీ వెబ్ సైట్ కు పేరు పెట్టాడట. రెండో వెబ్సైట్కు బలపం అని పేరు పెట్టాలని అనుకున్నాడు. డొమైన్లో టెక్నికల్ సమస్య వల్ల L అక్షరం తీసుకోలేదు. దీంతో దాని బదులు ఇంకో పీ అక్షరం పెట్టి బప్పం అని రిజిస్టర్ చేశాడు. ఇలా iBOMMA, BAPPAM TV పేర్లు రవి పెట్టాడు.
బషీర్‌‌బాగ్‌‌లోని సీసీఎస్ ఆఫీసులో ఐ బొమ్మ నిర్వాహకుడు ఇమ్మడి రవి కస్టడీ విచారణ జరిగింది. రవి నెట్‌‌వర్క్, ఆర్థిక లావాదేవీలు, ఐపీ మాస్కింగ్ విధానాలపై వివరాలు సేకరించారు. విదేశీ సర్వర్ల వినియోగం, యాడ్బుల్ యాప్ నిర్వహణ గురించి ఆరా తీశారు. అనధికార వెబ్సైట్ల నిర్వహణ, పైరసీ వీడియోలు అప్ లోడ్ చేసే టీమ్‌‌లు, వారి పాత్రపై కూడా పోలీసులు కూపీ లాగినట్లు సమాచారం. ఈ మూడు రోజుల విచారణలో సైబర్ క్రైమ్ టీంకు పలు కీలక సమాచారం లభించినట్లు తెలిసింది.
