వన్యప్రాణి అంటే వినోదం కోసం వాడుకునే బొమ్మ కాదు.. ప్రకృతిలో దానికంటూ ఓ జీవితం ఉంటుంది. కానీ కేరళలో వెలుగులోకి వచ్చిన ఓ వీడియో చూస్తే మాత్రం కొందరు యువకులు ఈ విషయాన్ని పూర్తిగా మర్చిపోయినట్టుగా అనిపిస్తోంది. ఓ భారీ కొండచిలువతో నలుగురు యువకులు చేసిన పని ఇప్పుడు సోషల్ మీడియాలో చర్చకు దారితీసింది.
తాడాట ఆడినట్టుగా.. కొండచిలువతో వింత చేష్టలు
కేరళలోని ఎర్నాకులం ప్రాంతానికి చెందినట్లుగా భావిస్తున్న ఈ వీడియోలో నలుగురు యువకులు ఓ కొండచిలువ(Rock Python)ను పట్టుకుని ఉన్నట్లు కనిపిస్తుంది. ఇద్దరు యువకులు ఆ పామును పట్టుకుని అటూ ఇటూ ఊపుతుండగా, మరో యువకుడు ఏకంగా అది తాడు అన్నట్టుగా దానిపై నుంచి దూకుతున్నట్లు వీడియోలో కనిపిస్తోంది.
సాధారణంగా ఇలాంటి పామును చూస్తేనే చాలామంది భయంతో దూరంగా పరుగులు తీస్తారు. అలాంటిది దాన్ని పట్టుకుని ఆటలు ఆడటం ఏంటంటూ ఈ వీడియో చూసిన నెటిజన్లు ఆశ్చర్యం వ్యక్తం చేస్తున్నారు. అసలు ఆ పాము ఏ పరిస్థితిలో ఉంది ? దానికి ఏమైనా గాయాలయ్యాయా? అనే ప్రశ్నలు కూడా తలెత్తుతున్నాయి.
అటవీ శాఖకు విజ్ఞప్తి
‘స్ట్రీట్ డాగ్ ఆఫ్ బాంబే’ అనే ఇన్‌స్టాగ్రామ్ పేజీ ఈ వీడియోను షేర్ చేసింది. అంతేకాదు, ఈ ఘటనపై కేరళ అటవీ శాఖ అధికారులు విచారణ జరిపి, బాధ్యులపై చట్టప్రకారం చర్యలు తీసుకోవాలని కోరింది.
వన్యప్రాణులు మనుషుల వినోదం కోసం పుట్టినవి కావని, వాటికీ స్వేచ్ఛగా జీవించే హక్కు ఉందని స్పష్టం చేసింది. జంతువులను ఆటబొమ్మల్లా చూడకుండా, వాటి పట్ల బాధ్యతగా వ్యవహరించాలని యువతకు సూచించింది.
సరదా కోసం చేసే పనులు.. మూగజీవాలకు ప్రమాదంగా మారితే?
సోషల్ మీడియాలో వైరల్ కావాలనే ఉద్దేశంతోనో, స్నేహితుల మధ్య సరదా కోసమో కొందరు చేసే పనులు మూగజీవాలకు ప్రమాదకరంగా మారే అవకాశం ఉంది. మనకు అది కొన్ని సెకన్ల వినోదంలా కనిపించవచ్చు. కానీ ఆ జంతువుకు మాత్రం భయం, ఒత్తిడి, గాయాల ప్రమాదం ఎదురవ్వొచ్చు.
కొండచిలువ వంటి వన్యప్రాణులను అనవసరంగా పట్టుకోవడం మనుషులకు కూడా ప్రమాదమే. అందుకే ఇలాంటి జంతువులు కనిపించినప్పుడు వాటిని ఆటపట్టించకుండా, దూరంగా ఉండి అటవీ శాఖ లేదా సంబంధిత వన్యప్రాణి రక్షణ సిబ్బందికి సమాచారం ఇవ్వడం మంచిది.
వైరల్ వీడియోల కోసం మూగజీవాలను ఇబ్బంది పెట్టడం సరదా కాదు.. వాటి ప్రాణాలకు, మన భద్రతకు సంబంధించిన విషయం. వన్యప్రాణులను ప్రేమించడం అంటే వాటితో ఆడుకోవడం కాదు.. వాటి సహజ జీవనానికి ఆటంకం కలిగించకుండా ఉండటమే..
