- బీఆర్ఎస్ హయాంలోనే రాష్ట్ర ఖజానాకు నష్టం
- మంత్రి వివేక్ వెంకటస్వామి
- చెన్నూరులో ఆధునిక షాపింగ్ కాంప్లెక్స్ కు శంకుస్థాపన
కోల్బెల్ట్/ కోటపల్లి, వెలుగు: రాష్ట్రంలో ఇసుక మాఫియాను కట్టడి చేశామని, ఈ ఏడాది రాయల్టీ ద్వారా ప్రభుత్వానికి రూ.1200 కోట్ల ఆదాయాన్ని తీసుకవస్తామని రాష్ట్ర కార్మిక, గనులశాఖ మంత్రి వివేక్ వెంకటస్వామి తెలిపారు. సామాన్య ప్రజలకు తక్కువ ధరకు ఇసుక అందించడంతోపాటు సర్కార్కు ఎక్కువ ఆమ్దానీ రాబట్టేలా పనిచేస్తున్నట్లు చెప్పారు. సోమవారం మంచిర్యాల జిల్లా చెన్నూరులో మంత్రి వివేక్ వెంకటస్వామి, -సరోజ దంపతులు పర్యటించారు. రోడ్డు విస్తరణలో షాప్లు కోల్పోయిన చిరువ్యాపారుల కోసం 15వ వార్డులో రూ.కోటి డీఎంఎఫ్టీ నిధులతో నిర్మించనున్న షాపింగ్ కాంప్లెక్స్పనులకు మున్సిపల్చైర్పర్సన్ పెద్దింటి పద్మ, వైస్ చైర్మన్ నాయకపు వినయ్తో కలిసి భూమిపూజ చేశారు. అనంతరం ప్రభుత్వ ఆస్పత్రిని తనిఖీ చేసి, వైద్య సేవలపై సమీక్షించారు. అలాగే శ్రీ మధున పోచమ్మ తల్లి ఆలయంలో పూజలు చేసి మొక్కులు తీర్చుకున్నారు.
అనంతరం ఆలయ చైర్మన్సతీశ్, పాలకవర్గ సభ్యులతో ప్రమాణస్వీకారం చేయించారు. ఆయా కార్యక్రమాల్లో మంత్రి వివేక్ మాట్లాడుతూ బీఆర్ఎస్ హయాంలో రూ.700 కోట్లకు మాత్రమే పరిమితమైన ఇసుక రాబడిలో రూ.300 కోట్లను బీఆర్ఎస్ లీడర్లు మింగారని, రాష్ట్ర ఖజానాకు నష్టం చేశారన్నారు. తాను మైనింగ్మినిస్టర్గా బాధ్యతలు చేపట్టిన తర్వాత ఇసుక ద్వారా వచ్చే ఆదాయాన్ని రూ.700 కోట్ల నుంచి రూ.1,000 కోట్లకు పెంచామని చెప్పారు. ఈ సంవత్సరం మొదటి ఆరు నెలల్లోనే ఇసుక రాయల్టీ ద్వారా రూ.600 కోట్ల ఆదాయాన్ని తీసుకవచ్చామని, ఈ ఏడాది మొత్తం రూ.1,200 కోట్ల ఆమ్దానీ తీసుకవస్తామన్నారు. కార్మిక శాఖలో రూ.150 కోట్ల కుంభకోణం జరిగిదంటూ తప్పుడు ప్రచారం చేస్తున్నారని ఫైర్అయ్యారు. బీఆర్ఎస్హయాంలో డెత్ సర్టిఫికెట్లకు సంబంధించిన స్కీం అమలు జరిగిందని, అప్పుడే అక్రమాలు జరిగాయన్నారు. తనకు వస్తున్న ప్రజాదరణను ఓర్వలేక బీఆర్ఎస్ లీడర్లు తప్పుడు ఆరోపణలు చేస్తున్నారని విమర్శించారు.
చెన్నూర్ను ఆదర్శవంతంగా తీర్చిదిద్దుతా
చెన్నూర్ పట్టణాన్ని ఆధునిక సౌకర్యాలతో అభివృద్ధి చేసి ఆదర్శంగా తీర్చిదిద్దుతానని మంత్రి వివేక్చెప్పారు. రోడ్డు విస్తరణలో దుకాణాలు కోల్పోయిన వ్యాపారుల కోసం 70 షాపులతో షాపింగ్ కాంప్లెక్స్‌‌ను 3, 4 నెలల్లో నిర్మిస్తామన్నారు. ట్రాఫిక్ సమస్య పరిష్కారానికి రూ.1.60 కోట్లతో బైపాస్ రోడ్డు నిర్మించామని, గోదావరి పుష్కరాల కోసం రూ.6 కోట్లతో అభివృద్ధి పనులు చేపట్టామని చెప్పారు. రూ.17 కోట్లతో శివాలయాన్ని పర్యాటక ప్రాంతంగా మారుస్తామన్నారు. వెజిటేబుల్మార్కెట్ అభివృద్ధి కోసం రూ.20 లక్షలు కేటాయించామని, నాన్‌‌వెజ్ మార్కెట్, ప్రజా మరుగుదొడ్ల నిర్మాణానికి చర్యలు తీసుకుంటున్నామన్నారు.
చెన్నూరులోని శ్రీ మధున పోచమ్మ ఆలయ అభివృద్ధికి రూ.2 కోట్లు కేటాయిస్తున్నట్లు మంత్రి ప్రకటించారు. ఈ నిధులతో భక్తుల సౌకర్యార్థం పెద్ద హాల్, టాయిలెట్ల నిర్మాణాన్ని చేపట్టాలని ఆలయ పాలకవర్గానికి సూచించారు. అలాగే కోటపల్లి మండలం అలుగాంలో ఫారెస్ట్ ఆఫీసర్ దాడిలో గాయపడిన మేకల కాపరులు కోర్తె సంతోష్, మారబోయిన ఓదెలును మంత్రి పరామర్శించారు. ఈ వ్యవహారంపై ఎంక్వైరీ చేయించి చర్యలు తీసుకుంటామని హామీ ఇచ్చారు. త్వరలోనే 100 పడకల ఆస్పత్రిని ప్రారంభించి, వైద్య సిబ్బందిని నియమిస్తామని తెలిపారు. మంత్రి వెంట చెన్నూరు మార్కెట్ కమిటీ చైర్మన్ మహేశ్ తివారి, తహసీల్దార్ మల్లికార్జున్, డీసీహెచ్ఎస్డాక్టర్ కోటేశ్వర్ రావు, ఆస్పత్రి పర్యవేక్షకుడు డాక్టర్ సత్యనారాయణ, ప్రజాప్రతినిధులు, కాంగ్రెస్ లీడర్లు తదితరులు పాల్గొన్నారు.
