పాకిస్థాన్‌కు పట్టపగలే చుక్కలు: 25 ఏళ్ల తర్వాత మైండ్ బ్లాకింగ్ రికార్డు.. ఆ 20 వికెట్లూ వాళ్లకే!

England vs Pakistan: పాకిస్థాన్ బ్యాటింగ్ లైనప్‌ను ఇంగ్లాండ్ ఫాస్ట్ బౌలర్లు పిండిపిండి చేశారు. లీడ్స్ వేదికగా జరిగిన తొలి టెస్టులో నిప్పులు చెరిగే బంతులతో విరుచుకుపడి, దాయాది దేశాన్ని కోలుకోలేని దెబ్బ కొట్టారు. టెస్టు క్రికెట్ చరిత్రలోనే గత 25 ఏళ్లలో చోటు చేసుకోని ఒక అత్యంత అరుదైన రికార్డుతో పాక్‌ను ఆల్ అవుట్ చేసింది ఇంగ్లీష్ జట్టు. ఈ మ్యాచ్‌లో ఇంగ్లాండ్ భారీ ఇన్నింగ్స్ విజయం సాధించి, 3 టెస్టుల సిరీస్‌లో 1–0 తేడాతో ఆధిక్యంలోకి దూసుకెళ్లింది.

పాక్ బ్యాటింగ్‌ను పిండిపిండి చేసిన ఆర్చర్ దళం:

ఒక టెస్టు మ్యాచ్‌లో ప్రత్యర్థి జట్టుకు చెందిన మొత్తం 20 వికెట్లను కేవలం ఫాస్ట్ బౌలర్లు మాత్రమే పడగొట్టడం గత 25 ఏళ్లలో ఇంగ్లాండ్‌కు ఇదే మొదటిసారి. సరిగ్గా 2001లో లార్డ్స్ వేదికగా పాకిస్థాన్‌పైనే ఇంగ్లాండ్ పేసర్లు (కాడిక్, గఫ్, కార్క్) మొత్తం 20 వికెట్లు పడగొట్టారు. మళ్లీ ఇన్నాళ్లకు అదే సీన్‌ను రిపీట్ చేస్తూ జోఫ్రా ఆర్చర్, ఆలీ రాబిన్సన్, జోష్ టంగ్ దళం పాక్ బ్యాటింగ్ వెన్నువిరిచేసింది.

135 రన్స్ కే చాపచుట్టేసిన పాక్.. మూడో రోజే మ్యాచ్ ఖతం:

ఈ మ్యాచ్‌లో మొదట బ్యాటింగ్ చేసిన పాకిస్థాన్ తొలి ఇన్నింగ్స్‌లో విఫలం కాగా, ఇంగ్లాండ్ తన ఫస్ట్ ఇన్నింగ్స్‌లో 409 పరుగులు చేసి ఏకంగా 238 పరుగుల భారీ ఆధిక్యం సాధించింది. అనంతరం రెండో ఇన్నింగ్స్ ప్రారంభించిన పాకిస్థాన్‌ను ఇంగ్లాండ్ పేసర్లు కేవలం 37.3 ఓవర్లలోనే 135 పరుగులకే కుప్పకూల్చారు. కొత్త బంతితో ఆర్చర్ ఓపెనర్లను వికెట్ తీయగా, రాబిన్సన్, జోష్ టంగ్ మిగతా పని పూర్తి చేసి మ్యాచ్‌ను మూడో రోజే క్లోజ్ చేసేశారు.

ALSO READ : 22 బంతుల్లో 5 వికెట్లు.. ఆస్ట్రేలియా ఊచకోత

హీడింగ్లీలో ఆసియా జట్లకు నిరాశే:

లీడ్స్‌లోని హీడింగ్లీ మైదానం ఇంగ్లాండ్‌కు కంచుకోటగా మారింది. ఈ గ్రౌండ్‌లో ఆడిన తొమ్మిది టెస్టుల్లో ఇంగ్లీష్ టీమ్ కు ఇది 8వ విజయం కావడం విశేషం. అందులోనూ 4 విజయాలు ఇన్నింగ్స్ తేడాతోనే వచ్చినవే, ఇక అవన్నీ ఆసియా జట్లపైనే (పాకిస్థాన్‌పై 2 సార్లు, భారత్, శ్రీలంకలపై తలోసారి) నమోదు కావడం గమనార్హం. ఈ దెబ్బతో తీవ్ర ఒత్తిడిలో పడిన పాక్, గురువారం నుంచి లార్డ్స్ వేదికగా ప్రారంభమయ్యే రెండో టెస్టులోనైనా పుంజుకుంటుందో లేదో చూడాల్సి ఉంది.

Watch out! 🚨

Tongue's about! 🙌

Scorecard/clips: https://t.co/2TQ7DhFIWC pic.twitter.com/d48ZfyejVt
— England Cricket (@englandcricket) August 21, 2026