దంతెవాడ: హిడ్మా ఎన్‌కౌంటర్‌ తర్వాత మావోయిస్టులు భారీ సంఖ్యలో లొంగిపోతున్నారు. ఛత్తీస్‌గఢ్‌లో ఆదివారం 37 మంది మావోయిస్టులు లొంగిపోయారు. దంతెవాడ ఎస్పీ ఆఫీస్‌లో మావోయిస్టులు లొంగిపోవడం గమనార్హం. లొంగిపోయిన 37 మంది మావోయిస్టుల్లో 27 మంది మావోయిస్టులపై రూ.65 లక్షల రివార్డు ఉంది. లొంగిపోయిన 37 మంది మావోయిస్టుల్లో 12 మంది మహిళా మావోయిస్టులు ఉన్నారు. లొంగిపోయిన వాళ్లలో కుమాలీ అలియాస్ అనితా మందావి, గీతా అలియాస్ లక్ష్మీ మద్కం, రంజన్ అలియాస్ సోమా మందావి, భీమా అలియాస్ జహ్రాజ్ కల్మూ కూడా ఉన్నారు.
లొంగిపోయిన మావోయిస్టులకు 50 వేల తక్షణ ప్రోత్సాహక నగదుతో పాటు స్కిల్ డెవలప్మెంట్ ట్రైనింగ్, వ్యవసాయంపై ఆసక్తి ఉన్నవారికి అగ్రికల్చరల్ ల్యాండ్ కూడా ప్రభుత్వం కేటాయించనుంది. ఛత్తీస్‌గఢ్‌లో గత 23 నెలల్లో 2 వేల 200 మంది మావోయిస్టులు సరెండర్ అయినట్లు పోలీసులు తెలిపారు.
మన దేశంలో మావోయిజాన్ని 2026 మార్చి నాటికి తుడిచిపెట్టేయాలని కేంద్ర ప్రభుత్వం కంకణం కట్టుకున్న సంగతి తెలిసిందే. మావోయిస్టులు లొంగిపోయి జన జీవన స్రవంతిలో కలిసిపోవాలని లేని పక్షంలో తీవ్ర పరిణామాలు ఎదుర్కోవాల్సి ఉంటుందని కేంద్ర హోం మంత్రి అమిత్ షా ఇప్పటికే హెచ్చరించారు.
జనవరి 1న సాయుధ పోరాటాన్ని విరమిస్తామని మావోయిస్టు పార్టీ ఇప్పటికే ప్రకటించింది. ఇది సంఘర్షణకు సమయం కాదని వెల్లడించింది. ప్రభుత్వంతో చర్చలు, సమన్వయం కోసం తమ రేడియో ఓపెన్ ఫ్రీక్వెన్సీ నంబర్ను విడుదల చేసింది. మావోయిస్టు పార్టీ మహారాష్ట్ర, మధ్యప్రదేశ్, చత్తీస్‌‌గఢ్ (ఎంఎంసీ) స్పెషల్ జోనల్ కమిటీ ప్రతినిధి అనంత్ పేరుతో రెండో లేఖను కూడా ఇప్పటికే రిలీజ్ చేశారు.
ఆయుధాలు అప్పగిస్తూ లొంగిపోవడానికి ఫిబ్రవరి 15 వరకు గడువు ఇవ్వాలని మొదటి లేఖలో కోరిన మావోయిస్టు పార్టీ.. ఇప్పుడు మరో 45 రోజుల ముందుగానే ప్రభుత్వానికి లొంగిపోవడానికి సిద్ధమైనట్లు తెలిపింది. మూడు రాష్ట్రాల ముఖ్యమంత్రులు, చత్తీస్ గఢ్ డిప్యూటీ సీఎంను అభ్యర్థిస్తూ ఈ లేఖను మీడియాకు విడుదల చేశారు. జోన్‌‌లో ఎక్కడా మావోయిస్టుల అరెస్టులు, ఎన్కౌంటర్ల వంటి ఘటనలకు పాల్పడకూడదని కోరారు. లొంగిపోవడం అంటే ద్రోహమేమీ కాదని అభిప్రాయపడ్డారు.
