న్యూఢిల్లీ: ఇప్పటికే వివిధ క్యాన్సర్ వ్యాధుల నిర్ధారణ, చికిత్సకు ఉపయోగపడే కొత్త విషయాలను గుర్తించిన ఆర్టిఫిషియల్ ఇంటెలిజెన్స్ (ఏఐ) టెక్నాలజీ.. తాజాగా ప్రోస్టేట్ క్యాన్సర్ విషయంలోనూ డాక్టర్లకు సైతం తెలియని కీలక విషయాన్ని గుర్తించింది. ఇప్పటివరకూ ప్రోస్టేట్ క్యాన్సర్ అనేది ఒకే వ్యాధి అని అందరూ అనుకుంటుండగా.. అది ఒకటి కాదు.. రెండు రకాలుగా ఉంటుందని ఏఐ తేల్చింది.
ఆక్స్ ఫర్డ్ వర్సిటీ, మాంచెస్టర్ వర్సిటీ, యూనివర్సిటీ ఆఫ్ ఈస్ట్ ఆంగ్లియా సైంటిస్టులు కలిసి పాన్ ప్రోస్టేట్ క్యాన్సర్ గ్రూప్ పేరుతో ఒక కన్సార్టియం ఏర్పాటు చేశారు. స్టడీలో భాగంగా 9 దేశాల్లోని 159 మంది ప్రోస్టేట్ క్యాన్సర్ పేషెంట్ల నుంచి ట్యూమర్ శాంపిల్స్ సేకరించారు. ఈ శాంపిల్స్లోని డీఎన్ఏలో జరిగిన మార్పులను అధ్యయనం చేశారు. అలాగే వీటి జీనోమ్ టెస్టుల డేటాను ఏఐ టెక్నాలజీని ఉపయోగించి కూడా స్టడీ చేశారు.
దీంతో నిజానికి జన్యుపరంగా ప్రోస్టేట్ క్యాన్సర్ రెండు వేర్వేరు సబ్ టైప్స్గా ఉందని ఏఐ విశ్లేషించింది. ఈ ఫలితాలతో భవిష్యత్తులో ప్రోస్టేట్ క్యాన్సర్ రకాన్ని కచ్చితంగా గుర్తించడంతోపాటు వ్యాధి రకాన్ని బట్టి, పేషెంట్లను బట్టి ప్రత్యేకమైన చికిత్సలు చేసేందుకూ వీలవుతుందని రీసెర్చర్లు తెలిపారు. ‘సెల్ జీనోమిక్స్’ జర్నల్ వీరి స్టడీని ప్రచురించింది.
