2025 ఇయర్ ఎండింగ్లో వస్తున్న పెద్ద సినిమా అఖండ 2. బాలయ్య, బోయపాటి హిట్ కాంబోలో వస్తున్న నాలుగో సినిమా ఇది. ట్రైలర్ కంటే ప్రీ రిలీజ్ ఈవెంట్ సందర్భంగా విడుదల చేసిన రిలీజ్ టీజర్ అంచనాలను అమాంతం పెంచేసింది. డిసెంబర్ 5న ప్రపంచవ్యాప్తంగా విడుదలవుతున్న అఖండ 2 సినిమా ప్రీమియర్ షో డిసెంబర్ 4న రాత్రి 9 గంటలకే తెలుగు రాష్ట్రాల్లో ప్రదర్శితం కానుంది.
ఈ ప్రీమియర్ షో టికెట్ ధరను 600 రూపాయలకు అమ్ముకునేందుకు అనుమతించాలని రెండు తెలుగు రాష్ట్రాల ప్రభుత్వాలకు అఖండ 2 సినిమా టీం అభ్యర్థన చేసింది. ఇరు రాష్ట్రాల ప్రభుత్వాలు కూడా ఈ అభ్యర్థనపై సుముఖంగానే ఉన్నట్లు సమాచారం. ప్రీమియర్ షో 600 రూపాయలు.. రిలీజ్ రోజు నుంచి పది రోజుల వరకూ సింగిల్ స్క్రీన్ థియేటర్లలో టికెట్పై 75 రూపాయలు, మల్టీప్లెక్స్ ల్లో 100 రూపాయల పెంపు కోరినట్లు తెలిసింది.
బాలకృష్ణ, బోయపాటి శ్రీను కాంబోలో రూపొందిన చిత్రం ‘అఖండ2 : తాండవం’. ఎం తేజస్విని నందమూరి సమర్పణలో 14 రీల్స్ ప్లస్ బ్యానర్‌‌పై రామ్ ఆచంట, గోపీ ఆచంట నిర్మించారు. డిసెంబర్ 5న పాన్ ఇండియా వైడ్‌‌గా సినిమా విడుదల కానుంది. ఈ సందర్భంగా శుక్రవారం ప్రీ రిలీజ్ ఈవెంట్‌‌ను నిర్వహించారు. బాలకృష్ణ మాట్లాడుతూ ‘నేను, బోయపాటి కలిసి సినిమా చేయాలనుకుంటే మూడు నిమిషాలే మాట్లాడుకుంటాం. ఆ తర్వాత రంగంలోకి దిగడమే. అదొక మహాయజ్ఞంలా భావిస్తాం. పిల్లలు, ప్రకృతి, ధర్మం జోలికెళ్తే దేవుడు మనిషిలో ఆవహించి శిక్షిస్తాడు అని ‘అఖండ’లో చూపించాం.
ఇందులో అధర్మం, అకృత్యాలు మితిమీరితే మనిషే ఆ దేవుడిని ఆవహించుకుని దుష్టశిక్షణ చేస్తాడనేది చెప్పాం. ఆ మహాశివుడి రుద్రతాండవ విన్యాసం అఖండ పాత్రలో చూడబోతున్నారు. ఆనాడు ఛత్రపతి శివాజీ సైన్యంలో కూడా అఘోరాలు ఉండేవారు. సరిహద్దుల్లో దేశాన్ని కాపాడటానికి సైనికులు ఉన్నట్టే.. దేశంలో మన ధర్మాన్ని కాపాడటానికి ఉన్న సైనికులే అఘోరాలు, స్వాములు. అలాంటి ఓ అఘోరాను ఇందులో చూడబోతున్నారు’ అని చెప్పారు.
బోయపాటి శ్రీను మాట్లాడుతూ ‘ప్రపంచ దేశాలకు మార్గదర్శం చేసేది భారతదేశం. అలాంటి దేశాన్ని ఎవరైనా ముట్టుకుంటే ఆ దేవుడే మృత్యువై మీదపడి యుద్ధం చేస్తాడు. ఆ మృత్యువుకు రూపం అద్దితే అతనే అఖండ. బాలయ్య గారే మా ఆస్తి, ఆయనే మా పవర్, ఆయనే మా ధైర్యం. ఈ సినిమాకు పనిచేసిన ప్రతి ఒక్కరికీ థ్యాంక్స్’ అని చెప్పారు.
