మహాభారతంలోని శక్తివంతమైన అంబ పాత్ర స్ఫూర్తితో వస్తున్న ఏఐ ఫీచర్ ఫిల్మ్ ‘అంబ’స్ రివెంజ్’. జయవర్ధన్ మడి తెరకెక్కించారు. నక్క తోక ఫిలిమ్స్ బ్యానర్పై యోగేంద్ర పొట్లూరి, రాణి మాడిసన్ నిర్మించారు. బుధవారం ఈ మూవీ టీజర్ను విడుదల చేశారు. భీష్ముని వల్ల ఒక జన్మలో మరణించిన ఆమె మరో జన్మలో పగ తీర్చుకోవడం ఈ చిత్ర ప్రధాన కథాంశం. పురాణ గాథకు అత్యాధునిక ఏఐ సాంకేతికతను జోడించి తెరకెక్కించారు. టీజర్ లాంచ్ ఈవెంట్లో దర్శకుడు జైవర్ధన్ మేడి మాట్లాడుతూ ‘అంబ పాత్రతో సినిమా అయినప్పటికీ శిఖండి కోణం నుంచి ఈ కథను చూడబోతున్నాం.
పాత్రలను పరిచయం చేయడానికి టీజర్ రిలీజ్ చేశాం. త్వరలో ట్రైలర్ విడుదల చేస్తాం’ అని చెప్పాడు. అందరూ సోషల్ మీడియా రీల్స్లో చూస్తున్నా ఏఐని మించిన విజువల్స్తో ఈ సినిమా అద్భుతంగా ఉండబోతోందని నిర్మాత యోగేంద్ర ప్రసాద్ పొట్లూరి అన్నారు. సంగీత దర్శకుడు ప్రమోద్ ఎంసి, డైలాగ్స్, లిరిక్స్ రైటర్ కిషోర్ కుమార్ ఏనుగు, ఎడిటర్ హ్యారీ బ్రెయిన్, విజువల్ డైరెక్టర్ సాయి నేత క్యారెక్టర్ డిజైనర్ చందు గోసంగి పాల్గొన్నారు.
