ఆసిఫాబాద్, వెలుగు: ఇందిరమ్మ ఇండ్ల నిర్మాణ పనులు స్పీడప్ చేసేలా అధికారులు పర్యవేక్షించాలని ఆసిఫాబాద్అడిషనల్ కలెక్టర్ దీపక్ తివారీ సూచించారు. శుక్రవారం కెరమెరి మండలం కేస్లాగూడ, లింగాపూర్ మండలం కుంచవెల్లి గ్రామపంచాయతీలను అధికారులతో కలిసి సందర్శించి ఇందిరమ్మ ఇండ్ల నిర్మాణ పనుల పురోగతిని పరిశీలించారు.
ఈ సందర్భంగా మాట్లాడుతూ.. ప్రభుత్వం నిరుపేదల సంక్షేమం కోసం ఇందిరమ్మ ఇండ్లు అందిస్తోందన్నారు. నిర్మాణ పనుల్లో నాణ్యత ప్రమాణాలు పాటించాలని, నిర్దేశిత విస్తీర్ణంలో ఇండ్లు నిర్మించుకునేలా లబ్ధిదారులకు అవగాహన కల్పించాలని అధికారులకు సూచించారు. ఇందిరమ్మ ఇండ్ల నిర్మాణానికి ప్రభుత్వం ఇసుకను ఉచితంగా అందిస్తోందని, ఈ అవకాశాన్ని లబ్ధిదారులు సద్వినియోగం చేసుకోవాలన్నారు.
నామినేషన్ ప్రక్రియ పారదర్శకంగా నిర్వహించాలి
జైనూర్, వెలుగు: పంచాయతీ ఎన్నికల్లో నామినేషన్ ప్రక్రియను పారదర్శకంగా, నిబంధనలకు అనుగుణంగా నిర్వహించాలని అడిషనల్ కలెక్టర్ దీపక్ తివారి సూచించారు. శుక్రవారం కెరమెరి, జైనూర్, సిర్పూర్(యు), లింగాపూర్ మండలాల్లో నామినేషన్ స్వీకరణ కేంద్రాలను పరిశీలించారు.
నామినేషన్ పత్రాల స్వీకరణ, ధృవీకరణ, రికార్డు నిర్వహణ పకడ్బందీగా ఉండాలని రిటర్నింగ్, సహాయ రిటర్నింగ్ అధికారులను ఆదేశించారు. నామినేషన్ కేంద్రాల వద్ద గుంపులు, ప్రచారాలు, బ్యానర్లు లేకుండా చూడాలని, పోలీసులతో సమన్వయం చేసి శాంతిభద్రతలు కట్టుదిట్టం చేయాలని సూచించారు. నిర్ణీత గడువు తరువాత దరఖాస్తులను స్వీకరించవద్దని, ప్రతి దశను జాగ్రత్తగా పర్యవేక్షించాలన్నారు.
