Bangladesh vs Australia: ఆసీస్ లోని డార్విన్ వేదికగా జరిగిన తొలి టెస్టు మ్యాచ్లో బంగ్లాదేశ్ జట్టు 9 వికెట్ల తేడాతో ఆస్ట్రేలియాపై చారిత్రాత్మక విజయాన్ని సాధించింది. టెస్టు క్రికెట్ చరిత్రలోనే ఆస్ట్రేలియా గడ్డపై బంగ్లాదేశ్కు ఇది మొదటి విజయం కావడంతో క్రీడా ప్రపంచం ఆశ్చర్యంలో మునిగిపోయింది. ప్రపంచంలోనే అత్యంత శక్తివంతమైన జట్లలో ఒకటైన ఆస్ట్రేలియాను వారి సొంతగడ్డపైనే చిత్తు చేయడంతో బంగ్లాదేశ్ ఆటగాళ్లు, అభిమానులు మైదానంలో సంబరాల్లో మునిగిపోయారు. 23 ఏళ్ల సుదీర్ఘ విరామం తర్వాత ఆస్ట్రేలియాలో టెస్టు మ్యాచ్ ఆడుతున్న బంగ్లా, ఈ విజయంతో తమ క్రికెట్ ప్రయాణంలో అత్యుత్తమ మైలురాయిని అందుకుంది.
ఆసీస్ ని దెబ్బకొట్టిన హసన్.. తంజీద్ సెంచరీ:
ఈ సంచలన విజయానికి తొలి రోజే పునాది పడింది. టాస్ గెలిచి బ్యాటింగ్కు దిగిన ఆస్ట్రేలియాను బంగ్లాదేశ్ పేసర్ హసన్ మహమూద్ తన బౌలింగ్ తో కుప్పకూల్చాడు. ఏకంగా 6 వికెట్లు పడగొట్టి ఆసీస్ను మొదటి ఇన్నింగ్స్లో కేవలం 198 రన్స్ కే పరిమితం చేశాడు. అనంతరం ఇన్నింగ్స్ ప్రారంభించిన బంగ్లాదేశ్ బ్యాటర్లు అద్భుత ప్రదర్శనతో 426 పరుగుల భారీ స్కోరు సాధించి 228 పరుగుల కొండంత ఆధిక్యాన్ని సాధించారు. ఆస్ట్రేలియా గడ్డపై టెస్టు సెంచరీ కొట్టిన తొలి బంగ్లాదేశ్ బ్యాటర్గా తంజీద్ హసన్ చరిత్ర సృష్టించగా, మెహిదీ హసన్ మిరాజ్ కూడా బ్యాట్తో అత్యంత కీలకమైన ఇన్నింగ్స్ ఆడాడు.
►ALSO READ | 288/2తో భారత్ జోరు.. వానతో డే-2 ఆటకు బ్రేక్!
మెహిదీ హసన్ పంజా.. ఈజీ లక్ష్యాన్ని ఛేదించిన బంగ్లా టైగర్స్:
రెండో ఇన్నింగ్స్లో ఆస్ట్రేలియా పుంజుకునేందుకు గట్టిగానే ప్రయత్నించింది. ఆసీస్ ఆల్ రౌండర్ కామరాన్ గ్రీన్ (104) పోరాట శతకంతో ఆదుకున్నప్పటికీ, బంగ్లా స్పిన్నర్ మెహిదీ హసన్ మిరాజ్ 5 వికెట్లతో చెలరేగి ఆసీస్ పతనాన్ని శాసించాడు. దీంతో ఆస్ట్రేలియా రెండో ఇన్నింగ్స్లో 284 పరుగులకు ఆలౌటైంది. అనంతరం 57 పరుగుల స్వల్ప లక్ష్యంతో బరిలోకి దిగిన బంగ్లాదేశ్, ఓపెనర్ తంజీద్ హసన్ వికెట్ను వెంటనే కోల్పోయినప్పటికీ, షాద్మన్ ఇస్లామ్, మోమినుల్ హక్లు సమయోచితంగా ఆడి విజయాన్ని పూర్తి చేశారు. ఈ గెలుపుతో బంగ్లాదేశ్ క్రికెట్ చరిత్రలోనే ఒక చిరస్మరణీయమైన విజయంగా నిలిచిపోతుంది.
Bangladesh defeated Australia in a Test match on Australian soil for the first time.#AUSvBAN pic.twitter.com/xoMbY6xJJw
— CAPTAIN SUII 🐐 (@VKBA1856) August 16, 2026
