దసరా బాక్సాఫీస్ బరిలో భారీ చిత్రాల మధ్య సైలెంట్‌గా ఈ రోజు ( అక్టోబర్ 16, 2026 ) థియేటర్లలోకి వచ్చిన రొమాంటిక్ ఫ్యామిలీ ఎంటర్‌టైనర్ 'క్రేజీ కళ్యాణం'. అనుపమ పరమేశ్వరన్, వీకే నరేశ్, తరుణ్ భాస్కర్ ప్రధాన పాత్రల్లో నటించిన ఈ చిత్రానికి బద్రప్ప గాజుల దర్శకత్వం వహించారు. యారో సినిమాస్ బ్యానర్‌పై బూసం జగన్ మోహన్ రెడ్డి నిర్మించిన ఈ సినిమా ప్రేక్షకులను ఏమేరకు మెప్పించిందో సమీక్షలో చూద్దాం.
కథేంటంటే?
మెదక్ జిల్లాకు చెందిన పర్వతాలు (నరేశ్) ఆత్మాభిమానానికి ప్రాధాన్యమిచ్చే మధ్యతరగతి తండ్రి. పెద్ద కూతురిని తాగుబోతైన బాలరాజు (తరుణ్ భాస్కర్)కిచ్చి పెళ్లి చేసి సమాజంలో పరువు పోగొట్టుకుంటాడు. దీంతో చిన్న కూతురు కీర్తి (అనుపమ పరమేశ్వరన్)కి మంచి సంబంధం చేసి పోయిన పరువు నిలబెట్టుకోవాలనుకుంటాడు. కానీ, స్వతంత్ర భావాలున్న కీర్తి కాలేజీ మేట్ ఉదయ్ (అఖిల్ రాజ్)ని ప్రేమిస్తుంది. తన పెళ్లి ముందుగా ప్రభుత్వ ఉద్యోగం సాధించాలనుకుంటుంది. అయితే తండ్రి పట్టుబట్టి అమెరికా సంబంధం ఫిక్స్ చేయగా.. కీర్తి తన తండ్రి ఆశలను నెరవేర్చిందా? లేదా ప్రేమను గెలుచుకుందా? అన్నదే అసలు కథ.
ఎలా ఉందంటే?
ఆడపిల్ల పుట్టినప్పటి నుంచి పెళ్లిళ్ల కోసం లక్షలు ఖర్చు పెట్టే బదులు.. అందులో పదో వంతు చదువుకు వెచ్చిస్తే వారి జీవితాలు మారిపోతాయనే చక్కటి సందేశాన్ని దర్శకుడు ఈ సినిమా ద్వారా చెప్పే ప్రయత్నం చేశారు. ఫస్టాఫ్‌లో తరుణ్ భాస్కర్ తాగుబోతు వేషాలు, నరేశ్‌తో ఆయన చేసే కామెడీ సన్నివేశాలు థియేటర్లలో నవ్వులు పూయిస్తాయి. అయితే కీర్తి - ఉదయ్ ల లవ్‌ట్రాక్ మాత్రం పూర్తిగా రొటీన్‌గా సాగి కాస్త బోర్ కొట్టిస్తుంది. ఇక సెకండాఫ్‌లో ఎమోషన్స్‌ డోస్ పెరిగింది. క్లైమాక్స్ కాస్త సాగదీసినట్లు అనిపించినా, తండ్రీకూతుళ్ల మధ్య వచ్చే భావోద్వేగ సన్నివేశాలు ఆలోచింపజేస్తాయి.
ఎవరెవరు ఎలా చేశారంటే?
మిడిల్‌క్లాస్ కూతురు కీర్తి పాత్రలో అనుపమ పరమేశ్వరన్ చక్కటి అభినయం కనబరిచింది. తెలంగాణ యాసలో మాట్లాడుతూనే.. ఎమోషనల్ సీన్లలో కట్టిపడేసింది. ఇక మధ్యతరగతి తండ్రి పర్వతాలుగా నరేశ్ జీవించేశారు. సినిమాకు ఆయనే అసలైన బలమనే చెప్పాలి. బాలరాజు పాత్రలో తరుణ్ భాస్కర్ తనదైన టైమింగ్‌తో నవ్వులు పంచగా, మిగతా నటీనటులు తమ పరిధి మేరకు మెప్పించారు. సాంకేతికంగా శ్యామ్ దూపాటి సినిమాటోగ్రఫీ పల్లె వాతావరణాన్ని అద్భుతంగా చూపించగా, సురేశ్ బొబ్బిలి నేపథ్య సంగీతం సినిమాను నిలబెట్టింది.
ALSO READ : 'దేవుడే వారిని చల్లగా చూడాలి'..
మొత్తంగా 'క్రేజీ కళ్యాణం' లో సందేశం బాగుంది.. నటీనటుల పనితీరూ మెప్పిస్తుంది. కానీ కథనంలో కొత్తదనం, బలమైన సన్నివేశాలు కొరవడటంతో పూర్తి స్థాయిలో అలరించలేకపోయింది. కుటుంబ భావోద్వేగాలు, అక్కడక్కడా నవ్వులు కోరుకునే ప్రేక్షకులకు ఒకసారి చూడదగిన చిత్రం.
