సినిమాల్లో అడుగుపెట్టడం ఒక ఎత్తయితే.. నటుడిగా తనకంటూ గుర్తింపు తెచ్చుకోవడం మరో ఎత్తు. ఎన్నో ఒడిదొడుకులు, విభిన్న పాత్రలతో పదేళ్లకు పైగా సాగిన తమిళ నటుడు సనంత్ రెడ్డి (Sananth Reddy) ప్రయాణంలో ఇప్పుడు ‘డొరోతి’ మైలురాయిగా నిలిచింది. పాత్రల ఎంపికలో వైవిధ్యం చూపిస్తూ, నటుడిగా తనను తాను నిరూపించుకుంటున్న సనంత్ ఇంట్రెస్టింగ్ జర్నీ ఇది. సనంత్ రెడ్డి వ్యక్తిగత జీవితానికి సంబంధించిన వివరాలు అందుబాటులో లేవు. సినిమాల మీద ఇంట్రెస్ట్తో చెన్నైలో రెండేండ్లపాటు థియేటర్ గ్రూప్లో నాటకాలు వేశాడు. తర్వాత షార్ట్ఫిల్మ్స్, డిఫరెంట్ స్టోరీ ప్రాజెక్టుల ద్వారా తనలోని నటుడిని మెరుగుపరుచుకునే ప్రయత్నం చేశారు.
తొలి అవకాశాలతో గుర్తింపు
2015లో విడుదలైన ‘డిమాంటీ కాలనీ’తో సనంత్ సినీ ప్రయాణం మొదలైంది. అజయ్ జ్ఞానముత్తు దర్శకత్వం వహించిన ఈ హారర్ చిత్రంలో నటించి ప్రేక్షకులకు పరిచయమయ్యారు. అదే ఏడాది ‘బెంచ్ టాకీస్’ వంటి ప్రాజెక్టుల్లోనూ భాగమయ్యారు. ఆ తర్వాత సిద్ధార్థ్ ప్రధాన పాత్రలో నటించిన ‘జిల్ జంగ్ జక్’లో కనిపించారు. విభిన్నమైన కథలు, పాత్రలతో సాగిన ఈ తొలి ప్రయాణం ఆయనకు పరిశ్రమలో అనుభవాన్ని అందించింది. అయితే వరుస విజయాలతో ఒక్కసారిగా స్టార్‌‌గా ఎదిగే అవకాశం మాత్రం రాలేదు. ఒక్కో ప్రాజెక్టుతో తన నటనా పరిధిని విస్తరించుకుంటూ ముందుకు వెళ్లాల్సి వచ్చింది.
వెబ్సిరీస్‌‌తో మరో అడుగు
సినిమాలకే పరిమితం కాకుండా డిజిటల్‌ వేదికపైనా సనంత్ తన ప్రతిభను చూపించారు. బాలాజీ మోహన్ రూపొందించిన ‘యాస్ ఐ యామ్ సఫరింగ్ ఫ్రమ్ కాదల్’ వెబ్ సిరీస్‌‌లో కీలక పాత్ర పోషించారు. ప్రేమ, సంబంధాలు, యువత జీవితంలోని భావోద్వేగాలను వినోదాత్మకంగా చూపించిన ఈ సిరీస్ ఆయనకు మరింత గుర్తింపు తెచ్చింది. ఒకే తరహా పాత్రలకు పరిమితం కాకుండా, భిన్నమైన కథల్లో భాగం కావాలనే ఆయన ఆసక్తికి ఈ ప్రాజెక్టులు అద్దం పట్టాయి.
డైరెక్టర్తో ప్రత్యేక అనుబంధం
ఒక దర్శకుడితో పదేపదే పనిచేయడం వెనుక నమ్మకం, అవగాహన ఉంటాయి. సనంత్ విషయంలోనూ అదే కనిపిస్తుంది. ‘మెర్క్యురీ’తో మొదలైన కార్తిక్ సుబ్బరాజ్‌‌తో ఆయన అనుబంధం ‘పేట్టా’, ‘మహాన్’, ‘జిగర్తాండ డబుల్ ఎక్స్’ వంటి చిత్రాలతో కొనసాగింది. ఈ సినిమాల్లో ప్రతిసారీ ఒకే తరహా పాత్రను కాకుండా విభిన్నమైన పాత్రలను పోషించే అవకాశం లభించింది. కొన్ని ప్రాజెక్టులు అనుకున్నట్లు కార్యరూపం దాల్చలేదని, తన సుదీర్ఘ ప్రయాణంలో ఎన్నో కారణాలతో అవకాశాలు చేజారాయని వెల్లడించారు.
‘డొరోతి’.. నటుడిగా కొత్త మలుపు
2026లో విడుదలైన ‘డొరోతి’ సనంత్ కెరీర్లో కీలకమైన మలుపుగా నిలిచింది. కార్తిక్ సుబ్బరాజ్ దర్శకత్వం వహించిన ఈ చిత్రంలో ఆయన రిషికాంత్‌‌తో కలిసి ప్రధాన పాత్రల్లో కనిపించారు. కీర్తి సురేశ్ కూడా కీలక పాత్ర పోషించారు. కులం, హింస, పురుషాధిక్య భావజాలం వంటి అంశాల మధ్య పెరిగిన ఇద్దరు స్నేహితుల జీవితాల్లో చోటుచేసుకునే మార్పుల చుట్టూ కథ సాగుతుంది.
సంబంధాలు, వ్యక్తిగత గుర్తింపు, అంగీకారం వంటి సున్నితమైన అంశాలను ఈ చిత్రం చర్చిస్తుంది. ఇందులో సనంత్ పోషించిన సుబ్బు పాత్ర కోసం ఆయన ప్రత్యేకంగా సిద్ధమయ్యారు. మదురైలో కొంతకాలం ఉండి అక్కడి వాతావరణాన్ని అర్థం చేసుకోవడంతోపాటు ట్రాన్స్‌‌జెండర్‌ మహిళలతో మాట్లాడి, వారి జీవిత ప్రయాణాన్ని తెలుసుకునే ప్రయత్నం చేశారు. పాత్రలో మూస ధోరణులు కనిపించకుండా సహజత్వానికి ప్రాధాన్యం ఇచ్చారు.
ప్రేక్షకుల మనసులను తాకిన పాత్ర
‘డొరోతి’లోని సున్నితమైన భావోద్వేగాలు, ముఖ్యంగా సనంత్, రిషికాంత్ కలిసి నటించిన కొన్ని సన్నివేశాలు సినిమా గురించి విస్తృతంగా మాట్లాడుకునేలా చేశాయి. చిత్ర ప్రచార సమయంలో ప్రేక్షకులను కలిసినప్పుడు తమకు లభించిన ప్రేమ, ఆప్యాయతలు మరచిపోలేనివని సనంత్ పేర్కొన్నారు. సినిమా చూసి భావోద్వేగానికి గురైనవారు వచ్చి కౌగిలించుకోవడం, తమ అనుభూతులను పంచుకోవడం తనకు ప్రత్యేకమైన అనుభవమని చెప్పారు. నటుడిగా గుర్తింపు రావడం ఒక విషయమైతే, తాను పోషించిన పాత్ర ప్రేక్షకుల మనసుల్లో చోటు సంపాదించుకోవడం మరో విషయమని ఈ స్పందన తెలియజేస్తుంది.
సనంత్ కెరీర్ ప్రారంభం నుంచీ హారర్, కామెడీ, నిశ్శబ్ద థ్రిల్లర్‌, వెబ్ సిరీస్, భావోద్వేగ ప్రధాన చిత్రాల్లో నటించారు. తనలోని నటుడికి కొత్త సవాళ్లు ఎదురయ్యే కథలను ఎంచుకోవాలనే ఆసక్తి ఆయన కెరీర్లో కనిపిస్తుంది. సినిమా పరిశ్రమలో విజయం కొన్నిసార్లు ఆలస్యంగా వస్తుంది. కానీ ఆ నిరీక్షణలో నటనపై నమ్మకాన్ని కోల్పోకుండా ఉండటం ముఖ్యం. సనంత్ రెడ్డి జర్నీ చెప్పే విషయమూ అదే. ప్రతి పాత్రను ఒక కొత్త అనుభవంగా తీసుకుంటూ, తనను తాను నిరూపించుకునే ప్రయత్నం చేసిన ఆయనకు ‘డొరోతి’ మంచి గుర్తింపును అందించింది. ఇకపై ఎలాంటి కథలు, పాత్రలతో ప్రేక్షకుల ముందుకు వస్తారో చూడాలి.
సినీ ప్రయాణం
సినిమాల్లో నిలదొక్కుకోవడం అంటే కేవలం నటించే అవకాశం దక్కించుకోవడం కాదు. వచ్చిన అవకాశాలను నిలబెట్టుకోవడం, కొత్త పాత్రలకు సరిపోతానని నిరూపించుకోవడం, తర్వాత సినిమా కోసం ఎదురుచూడటం.. ఇలా ఎన్నో సవాళ్లు ఉంటాయి. సనంత్ ప్రయాణంలోనూ ఈ నిరీక్షణ భాగమైంది. తొలి చిత్రాల తర్వాత వెంటనే పెద్ద స్థాయి గుర్తింపు రాకపోయినా నటనను కొనసాగించారు. ఒక సినిమా తర్వాత మరో సినిమా చేస్తూ అనుభవాన్ని పెంచుకున్నారు. తన కెరీర్లో ఎన్నో ప్రాజెక్టులు ముందుకు సాగలేదని ఆయన స్వయంగా చెప్పడం ఈ ప్రయాణంలోని ఒడిదొడుకులను తెలియజేస్తుంది. అయినా ఆ పరిణామాలను వ్యక్తిగత వైఫల్యాలుగా తీసుకోకుండా తనకు వచ్చిన పాత్రలకు న్యాయం చేయడంపైనే దృష్టి పెట్టారు.
