గుంటూరు: పోలీసులతో వైసీపీ సీనియర్ నేత, మాజీ మంత్రి అంబటి రాంబాబు ప్రవర్తన చర్చనీయాంశంగా మారింది. గుంటూరు నగరంలో వైసీపీ మేయర్ అభ్యర్థి నామినేషన్ సందర్భంగా పోలీసులపై అంబటి రాంబాబు ధ్వజమెత్తారు.
రెండు సంవత్సరాల తర్వాత తమ ప్రభుత్వమే అధికారంలో ఉంటుందని, ఇక్కడ ఉన్న పోలీసులు అందరూ మంచోళ్ళే కానీ ఒక్కళ్ళు మాత్రం కాదని ఆయన చేసిన వ్యాఖ్యలు స్థానికంగా రచ్చ లేపాయి. తమ ప్రభుత్వం వచ్చిన మొదటి ఆరు నెలలు తానే హోం మంత్రిగా ఉంటానని పోలీసులను హెచ్చరించే ధోరణిలో అంబటి రాంబాబు చేసిన వ్యాఖ్యలు కాక రేపాయి.
రిజర్వేషన్లో భాగంగా గుంటూరు నగర పాలక సంస్థ మేయర్ సీటు మహిళలకు రిజర్వ్ కావడంతో టీడీపీ, వైసీపీ తమ మేయర్ అభ్యర్థినిలతో ఇప్పటికే నామినేషన్ దాఖలు చేయించాయి. వైసీపీ మేయర్ అభ్యర్థిగా వైశ్య సామాజిక వర్గానికి చెందిన శ్రీదేవి నామినేషన్ దాఖలు చేశారు. ఇక.. గుంటూరు మేయర్ అభ్యర్థిగా టీడీపీ నుంచి కోవెలమూడి లక్ష్మీ అపర్ణ నామినేషన్ దాఖలు చేశారు.
