కె- డ్రామాలో కుటుంబం ఎంత ముఖ్యమో పెద్దలకు గౌరవం, ప్రేమ, ఎమోషన్స్ను కంట్రోల్ చేసుకోవడం వంటివన్నీ అంతే ముఖ్యం అనేదే సారాంశం. మనదేశంలో ప్రతి ఇంట్లో లేదా జాయింట్ ఫ్యామిలీస్లో రోజూ చూసే సీన్లే కె – డ్రామాల్లోనూ కనిపిస్తాయి. అయినా సరే కె– డ్రామాల్లో ఇవన్నీ చూస్తే మనవాళ్ల మనసు ఐస్లా కరిగిపోతోంది.
మొదట్లో కె – డ్రామాలను పాతికేండ్లలోపు వాళ్లు, టీనేజర్స్ ఎక్కువగా చూసేవాళ్లు. కానీ ఓటీటీల్లో కె –- డ్రామా వ్యూస్ పెరిగినప్పటి నుంచి 30 ఏళ్లు దాటినవాళ్లు కూడా హిందీ డబ్బింగ్లో చూస్తున్నారు. ఇది కేవలం యూత్ ట్రెండ్ కాదు.. ఇది ఫ్యామిలీ ఎంటర్టైన్మెంట్ అయిపోయింది.
మన సినిమాల్లో హీరోలు మాస్ ఇమేజ్తో ఆడియెన్స్ని అట్రాక్ట్ చేస్తుంటారు. కానీ కొరియన్ హీరోలు అలా కాదు. హీరోలైనా కన్నీళ్లు పెట్టుకుంటారు. క్షమాపణలు అడుగుతారు. వంట చేస్తారు. భావోద్వేగాలను ఓపెన్గా ఎక్స్ప్రెస్ చేస్తారు. ఈ ‘సాఫ్ట్ మాస్కులినిటీ’ మహిళలను, యువతులను ఎంతో ఆకట్టుకుంటోంది.
బీటీఎస్, బ్లాక్ పింక్ వంటి కె – -పాప్ మోడల్స్ను ఐడల్స్గా భావిస్తున్నారు. వాళ్ల ఫ్యాషన్, స్కిన్కేర్, సెల్ఫ్- లవ్.. ఇవన్నీ జెండర్కు అతీతంగా ఉంటాయి. ఇప్పుడు మనదేశంలోని అమ్మాయిలు కూడా కొరియన్ బ్యూటీ కోసం ‘గ్లాసీ స్కిన్’ మేకప్ టిప్స్ ఫాలో అవుతున్నారు.
మన ప్లేట్లో కొరియన్ ఫుడ్
స్విగ్గీ 2025 రిపోర్ట్ ప్రకారం.. బెంగళూరు, ముంబైలో కొరియన్ ఫుడ్ ఆర్డర్లు 50 శాతం పెరిగాయి. సూరత్, మైసూరు వంటి టైర్-2, 3 సిటీల్లో కూడా 59 శాతం గ్రోత్ ఉంది. కిమ్చి, టోక్బోక్కి, కొరియన్ ఫ్రైడ్ చికెన్, రామెన్ వంటి కె– డ్రామాల్లో చూసిన ఫుడ్ ఐటెమ్స్ ఇప్పుడు మన ప్లేట్లో ఉంటున్నాయి. ఫ్యాషన్లో ఓవర్సైజ్డ్ టీ-షర్ట్స్, పేస్టల్ కలర్స్, మినిమలిస్ట్ లుక్.. కాలేజీలు, సోషల్ మీడియాల్లో ఇవి ట్రెండ్ అయిపోయాయి.
కె–- పాప్ బ్యాండ్స్ బీటీఎస్, బ్లాక్ పింక్, ట్వైస్.. వీళ్ల పాటలు ఇప్పుడు ఇండియన్ డ్యాన్స్ స్టూడియోలు, కాలేజీ ఫెస్ట్స్లో ఎక్కువగా వినిపిస్తాయి. కె – డ్రామాల్లో యానిమేటెడ్ సిరీస్ కూడా గ్లోబల్గా టాప్లో ఉంది. అంతేకాదు.. ఆ డ్రామాల్లోని డైలాగ్స్, పాటల్లోని లిరిక్స్ అర్థం చేసుకోవాలని ఆసక్తితో మనదేశంలో కొరియన్ భాష నేర్చుకునేవారు 75 శాతం పెరిగారని ‘డుయొలింగో’ రిపోర్ట్ చెప్తోంది. ఇప్పుడు భారతదేశంలో15 మిలియన్ల మందికి పైగా కొరియన్ కల్చర్ ఫ్యాన్స్ ఉన్నారు. ఇదీ మనవాళ్లకు కొరియన్ కల్చర్తో ఉన్న కనెక్షన్.
