రేపో, ఎల్లుండో గ్రూప్ 1 నోటిఫికేషన్   

• రెండు డిపార్ట్​మెంట్ల జీవోల కోసమే టీఎస్ పీఎస్సీ వెయిటింగ్ 
• అవసరమైతే ఆ పోస్టులను తీసేసేందుకు యోచన 

హైదరాబాద్, వెలుగు:  గ్రూప్1 నోటిఫికేషన్​ రిలీజ్​కు టీఎస్ పీఎస్సీ సిద్ధమైంది. రాష్ట్రంలో కొత్త జోనల్ విధానం అమల్లోకి రావడంతో ఈ సారి గ్రూప్1 పోస్టుల సెలెక్షన్ ప్రాసెస్ అంతా మల్టీజోన్ విధానంలోనే నిర్వహించేందుకు అంతా రెడీ అయింది. రెండు, మూడు రోజుల్లోనే నోటిఫికేషన్ రిలీజ్ అయ్యే అవకాశమున్నట్టు టీఎస్​పీఎస్సీ వర్గాలు వెల్లడించాయి. మరో రెండు డిపార్ట్ మెంట్లలో కొత్త పోస్టులకు సంబంధించి రావాల్సిన జీవోల కోసమే ప్రస్తుతం వెయిట్ చేస్తున్నట్టు చెబుతున్నారు. గ్రూప్ 1 కింద 19 కేటగిరీలకు చెందిన 503 పోస్టులను భర్తీ చేస్తామని సర్కారు ఇదివరకే ప్రకటించింది. రాష్ట్రంలో ఇదే తొలి గ్రూప్ 1 నోటిఫికేషన్ కావడంతో దీనిని సీరియస్ గా తీసుకుంది. అయితే సీఎం ప్రకటన తర్వాత  వారం, పది రోజుల్లోనే నోటిఫికేషన్ వస్తుందని అనుకున్నా, పలు డిపార్ట్​మెంట్ల నుంచి సరైన సమాచారం  రాకపోవడంతో ఆలస్యమవుతోంది. 

మల్టీజోన్‌‌ల వారీగానే ‘గ్రూప్1’
ఈ సారి కొత్తగా గ్రూప్ 1 కేటగిరీలో మైనార్టీ శాఖలో జిల్లా మైనార్టీస్ వెల్ఫేర్ ఆఫీసర్ పోస్టులతో పాటు పోలీస్ శాఖలోని డీఎస్పీ కేటగిరీలోని కొన్ని పోస్టులను క్రియేట్ చేశారు. వీటికి ఆయా డిపార్ట్​మెంట్ల నుంచి గుర్తింపు ఇస్తూ అఫిషియల్ జీవోలు రావాల్సి ఉంది. అవి పెండింగ్​లోనే ఉండటంతో నోటిఫికేషన్ వాయిదా పడుతూ వస్తోంది. అయితే ఈ రెండు కేటగిరీల పోస్టుల భర్తీకి ఏమైనా న్యాయపరమైన చిక్కులున్నాయా? అనే విషయంపై సర్కారు పరిశీలిస్తున్నట్టు తెలుస్తోంది. ఒకవేళ ఇంకా ఆలస్యమయ్యే అవకాశం ఉంటే, ఈ పోస్టులను గ్రూప్ 1 నుంచి తొలగించి, మిగిలిన పోస్టులతో నోటిఫికేషన్ ఇచ్చే అవకాశమూ ఉందని టీఎస్​పీఎస్సీ వర్గాలు చెబుతున్నాయి.   
ఆగస్టు లేదా సెప్టెంబర్​లో ప్రిలిమ్స్  
గ్రూప్ 1 ప్రిలిమ్స్ ఎగ్జామ్ ఆగస్టు నెలాఖరు లేదా సెప్టెంబర్ నెలలో నిర్వహించేందుకు టీఎస్​పీఎస్సీ అధికారులు కసరత్తు చేస్తున్నారు. అప్లికేషన్ల ప్రక్రియకు నెలరోజుల టైమ్  ఇచ్చి, ప్రిపరేషన్​కు మరో మూడు నెలల గడువు ఇవ్వాలని యోచిస్తున్నారు. తెలంగాణలో తొలిసారిగా గ్రూప్ 1 నోటిఫికేషన్ ఇస్తుండటంతో దీనికి ఎలాంటి న్యాయపరమైన చిక్కులు రాకుండా అధికారులు జాగ్రత్తలు తీసుకుంటున్నారు. స్టేట్ కేడర్ పోస్టులు రద్దు కావడంతో మల్టీజోన్ పోస్టులుగా గ్రూప్ 1 పోస్టులను భర్తీ చేయనున్నారు. రెండు మల్టీజోన్ల వారీగా పోస్టులను ఇప్పటికే విభజించి, ప్రతిపాదనలు రెడీ చేశారు. మరోపక్క పలు పోస్టులకు క్వాలిఫికేషన్లనూ మార్చారు. ఆర్టీఓ పోస్టులకు ఆటోమొబైల్ ఇంజినీరింగ్ డిగ్రీని తప్పనిసరి చేసినట్టు తెలిసింది.