షాద్‌నగర్: రంగారెడ్డి జిల్లా షాద్‌నగర్ సమీపంలోని రాయికల్ టోల్ ప్లాజా వద్ద వాహనాల రద్దీ కొనసాగుతోంది. హైదరాబాద్–బెంగళూరు జాతీయ రహదారిపై వాహనాలు కిలోమీటర్ల మేర బారులు తీరడంతో వాహనదారులు తీవ్ర ఇబ్బందులు ఎదుర్కొంటున్నారు.
వీకెండ్‌తో పాటు పండుగ సీజన్ కావడంతో జాతీయ రహదారిపై ఒక్కసారిగా వాహనాల సంఖ్య పెరిగింది. దీంతో టోల్ ప్లాజా వద్ద రద్దీ అధికమై ట్రాఫిక్‌కు అంతరాయం ఏర్పడింది.సమాచారం అందుకున్న ట్రాఫిక్ పోలీసులు వెంటనే రంగంలోకి దిగారు. టోల్ ప్లాజా వద్ద అదనపు లేన్లను తెరిచి వాహనాల రాకపోకలను క్రమబద్ధీకరిస్తున్నారు. ట్రాఫిక్ రద్దీని తగ్గించేందుకు చర్యలు చేపట్టారు.
వాహనదారులు పోలీసులకు సహకరించాలని, వీలైనంత వరకు ప్రత్యామ్నాయ మార్గాలను ఎంచుకోవాలని అధికారులు సూచిస్తున్నారు. పండుగ సీజన్ నేపథ్యంలో జాతీయ రహదారిపై ప్రయాణించే వారు ముందస్తు ప్రణాళికతో బయలుదేరాలని సూచిస్తున్నారు.
