బాలకృష్ణ, బోయపాటి శ్రీను కాంబోలో రూపొందిన చిత్రం ‘అఖండ2 : తాండవం’. ఎం తేజస్విని నందమూరి సమర్పణలో 14 రీల్స్ ప్లస్ బ్యానర్‌‌పై రామ్ ఆచంట, గోపీ ఆచంట నిర్మించారు. డిసెంబర్ 5న పాన్ ఇండియా వైడ్‌‌గా సినిమా విడుదల కానుంది. ఈ సందర్భంగా శుక్రవారం ప్రీ రిలీజ్ ఈవెంట్‌‌ను నిర్వహించారు. బాలకృష్ణ మాట్లాడుతూ ‘నేను, బోయపాటి కలిసి సినిమా చేయాలనుకుంటే మూడు నిమిషాలే మాట్లాడుకుంటాం. ఆ తర్వాత రంగంలోకి దిగడమే. అదొక మహాయజ్ఞంలా భావిస్తాం.
పిల్లలు, ప్రకృతి, ధర్మం జోలికెళ్తే దేవుడు మనిషిలో ఆవహించి శిక్షిస్తాడు అని ‘అఖండ’లో చూపించాం. ఇందులో అధర్మం, అకృత్యాలు మితిమీరితే మనిషే ఆ దేవుడిని ఆవహించుకుని దుష్టశిక్షణ చేస్తాడనేది చెప్పాం. ఆ మహాశివుడి రుద్రతాండవ విన్యాసం అఖండ పాత్రలో చూడబోతున్నారు. ఆనాడు ఛత్రపతి శివాజీ సైన్యంలో కూడా అఘోరాలు ఉండేవారు. సరిహద్దుల్లో దేశాన్ని కాపాడటానికి సైనికులు ఉన్నట్టే.. దేశంలో మన ధర్మాన్ని కాపాడటానికి ఉన్న సైనికులే అఘోరాలు, స్వాములు. అలాంటి ఓ అఘోరాను ఇందులో చూడబోతున్నారు’ అని చెప్పారు.
బోయపాటి శ్రీను మాట్లాడుతూ ‘ప్రపంచదేశాలకు మార్గదర్శం చేసేది భారతదేశం. అలాంటి దేశాన్ని ఎవరైనా ముట్టుకుంటే ఆ దేవుడే మృత్యువై మీదపడి యుద్ధం చేస్తాడు. ఆ మృత్యువుకు రూపం అద్దితే అతనే అఖండ. బాలయ్య గారే మా ఆస్తి, ఆయనే మా పవర్, ఆయనే మా ధైర్యం. ఈ సినిమాకు పనిచేసిన ప్రతి ఒక్కరికీ థ్యాంక్స్’ అని చెప్పారు. సంయుక్త మీనన్ మాట్లాడుతూ ‘శివుడు అంటే చిన్నప్పట్నుంచీ చాలా ఇష్టం. ఈ చిత్రంలో నటించే ఛాన్స్‌ రావడం హ్యాపీ. బాలయ్య గారితో చాలా ఎనర్జిటిక్‌‌గా షూటింగ్ సాగింది. ఆయన ఎనర్జీతోనే టీమ్ అంతా వర్క్ చేశాం’ అని చెప్పింది.
ఈ చిత్రంలో విలన్ పాత్ర పోషించడం చాలా ఆనందంగా ఉందని ఆది పినిశెట్టి చెప్పాడు. నిర్మాతలు రామ్ ఆచంట, గోపీ ఆచంట మాట్లాడుతూ ‘కెమెరా ముందు బాలయ్య బాబు తాండవం, కెమెరా వెనుక బోయపాటి తాండవం చూసి థియేటర్స్‌‌లో ఆడియెన్స్ తాండవం ఉంటుంది. డబుల్ బ్లాక్ బస్టర్ అవుతుందనే నమ్మకం ఉంది. దేశవ్యాప్తంగా బాలయ్య నట విశ్వరూపం చూస్తారు’ అని అన్నారు. మ్యూజిక్ డైరెక్టర్ తమన్ మాట్లాడుతూ ‘ఫస్ట్ పార్ట్‌‌లోనే అన్ని చేసేశాం.. ‘అఖండ2’లో ఏం చేయాలని ఆలోచించా. శివుడి రూపంలో ఉన్న బాలయ్య గారిని చూస్తే నాలో చాలా ఎనర్జీ వచ్చింది.
స్పీకర్లు ఫైర్ అయ్యాయని మళ్లీ కంప్లైట్ చేయకండి.. ముందే అన్ని థియేటర్స్‌‌లో స్పీకర్లు సర్వీస్ చేసి పెట్టుకోండి’ అని చెప్పాడు. నటులు మురళీ మోహన్, పూర్ణ, హర్షాలీ మల్హోత్రా, మహేంద్రన్, కబీర్ దుహాన్ సింగ్, సమ్మెట గాంధీ, శరత్ చంద్ర, రచ్చ రవి, ఫైట్ మాస్టర్స్ రామ్, లక్ష్మణ్, సినిమాటోగ్రాఫర్ సంతోష్, ఎడిటర్ తమ్మిరాజు, భగవద్గీత ఫౌండేషన్ గంగాధర శాస్త్రి, లిరిసిస్టులు కాసర్ల శ్యామ్, కళ్యాణ్ చక్రవర్తి తదితరులు పాల్గొన్నారు.
