న్యూజిలాండ్ పై తొలి రెండు టీ20లు గెలిచిన టీమిండియా మూడో టీ20కి సిద్ధమవుతోంది. ఆదివారం (జనవరి 25) గౌహతి వేదికగా బర్సపారా క్రికెట్ స్టేడియంలో జరగనున్న ఈ మ్యాచ్ లో భారత జట్టు ఫేవరేట్ గా బరిలోకి దిగుతుంది. 5 మ్యాచ్ ల టీ20 సిరీస్ లో టీమిండియా ప్రస్తుతం 2-0 ఆధిక్యంలో నిలిచింది. నేడు జరగనున్న మ్యాచ్ లోనూ గెలిచి టీమిండియా సిరీస్ కైవసం చేసుకోవాలని భావిస్తోంది. మరోవైపు న్యూజిలాండ్ ఈ మ్యాచ్ లో గెలిచి సిరీస్ పై ఆశలు సజీవంగా ఉంచుకోవాలని ప్రయత్నిస్తుంది. మ్యాచ్ సాయంత్రం 7:00 గంటలకు ప్రారంభమవుతుంది. ఈ మ్యాచ్ లో టీమిండియా ప్లేయింగ్ 11 ఎలా ఉంటుందో ఇప్పుడు చూద్దాం..
రెండో టీ20లో గెలిచిన టీమిండియా మూడో టీ20కి మార్పులు లేకుండా బరిలోకి దిగనుంది. బ్యాటింగ్, బౌలింగ్ విభాగాల్లో అదరగొట్టిన మన జట్టు గౌహతి టీ20 కోసం ఎలాంటి మార్పులు చేయడం లేదు. అభిషేక్ శర్మతో పాటు సంజు శాంసన్ ఇన్నింగ్స్ ను ఆరంభించనున్నారు. బ్యాకప్ వికెట్ కీపర్ ఇషాన్ కిషాన్ మూడో స్థానంలో ఆడతాడు. నాలుగో స్థానంలో కెప్టెన్ సూర్య కుమార్ యాదవ్ బ్యాటింగ్ కు వస్తాడు. ఐదో స్థానంలో ఫాస్ట్ బౌలింగ్ ఆల్ రౌండర్ హార్దిక్ పాండ్య స్థానానికి ఎలాంటి ఢోఖా లేదు. ఆరో స్థానంలో రింకూ సింగ్.. ఏడో స్థానంలో శివమ్ దూబే ఆడతారు. ఎనిమిదో స్థానంలో హర్షిత్ రానాకి మరోసారి ఛాన్స్ దక్కనుంది. వరుణ్ చక్రవర్తి, కుల్దీప్ యాదవ్,అర్షదీప్ సింగ్ స్పెషలిస్ట్ బౌలర్లుగా కొనసాగుతారు.
శాంసన్ పై ఒత్తిడి
ఇషాన్ గత మ్యాచ్లో అద్భుతంగా ఆడగా.. శాంసన్ రెండు ఇన్నింగ్స్ల్లో 10, 6 స్కోర్లతో విఫలమయ్యాడు. దాంతో వరల్డ్ కప్లో అభిషేక్ శర్మకు ఓపెనింగ్ జోడీగా ఎవరిని పంపాలనే దానిపై మళ్లీ చర్చ మొదలైంది. ఎక్స్ట్రా పేస్ను ఎదుర్కోవడంలో బలహీనతను మళ్లీ బయటపెట్టిన శాంసన్ కీపింగ్లోనూ తడబడుతున్నాడు. అదే టైమ్లో ఇషాన్ మ్యాచ్ విన్నింగ్ ఇన్నింగ్స్ ఆడటంతో శాంసన్పై తీవ్ర ఒత్తిడి నెలకొంది. ఈ నేపథ్యంలో సంజూ ఫామ్ అందుకోకపోతే వరల్డ్ కప్లో బెంచ్కే పరిమితం అయ్యే ప్రమాదం ఉంది. స్టార్ పేసర్ బుమ్రా లేకపోయినా.. గత పోరులో బౌలర్లు ఫర్వాలేదనించారు. బుమ్రా తిరిగి వస్తే బౌలింగ్ బలం మరింత పెరగనుంది. చేతి వేలి గాయానికి గురైన అక్షర్ పూర్తిగా కోలుకోకుంటే కుల్దీప్ ఈ మ్యాచ్లోనూ బరిలోకి దిగుతాడు.
తొలి గెలుపు కోసం కివీస్ ఆరాటం:
గతేడాది టెస్టుల్లో, ఈ నెలలో వన్డేల్లో ఇండియాను ఓడించిన న్యూజిలాండ్.. షార్ట్ ఫార్మాట్లో మాత్రం తేలిపోతోంది. వరుసగా రెండు ఓటములతో 0–2తో ఉన్న కివీస్ ఇప్పుడు చావోరేవో తేల్చుకోనుంది. సిరీస్ ఆశలు సజీవంగా నిలుపుకోవాలంటే కచ్చితంగా నెగ్గాల్సిన మ్యాచ్ కావడంతో కెప్టెన్ మిచెల్ శాంట్నర్.. తన వ్యూహాలు మార్చనున్నాడు. ఇన్ఫామ్ బ్యాటర్ డారిల్ మిచెల్ను బ్యాటింగ్ ఆర్డర్లో ముందుకు పంపొచ్చు. బ్యాటింగ్, బౌలింగ్తో పాటు ఫీల్డింగ్లోనూ మెరుగైతేనే కివీస్ సిరీస్లో నిలుస్తుంది.
