ఇన్స్టాగ్రామ్ ఆర్టిఫిషియల్ ఇంటెలిజెన్స్తో క్రియేట్ చేసిన ఫొటోలు లేదా వీడియోల వల్ల జరిగే మోసాలను అరికట్టడానికి ఒక కొత్త పద్ధతిని తీసుకొచ్చింది. సాధారణంగా కొంతమంది వ్యక్తులు కంప్యూటర్ సాయంతో నిజమైన మనుషులలాగే కనిపించే ఆర్టిఫిషియల్ మనుషులను సృష్టించి ఇతరులను నమ్మించి మోసాలకు పాల్పడుతుంటారు. దీన్నే ‘క్యాట్ఫిషింగ్’ అని పిలుస్తుంటాం. ఇలాంటి మోసాలకు అడ్డుకట్ట వేయడానికి, ఏదైనా ఒక చిత్రం లేదా వీడియో ఏఐతో తయారైతే దానికి ప్రత్యేకమైన గుర్తును లేదా పేరును కేటాయిస్తారు.
దీనివల్ల యూజర్లు ఆ కంటెంట్ చూసినప్పుడు అది నిజమైన మనిషిదా లేక ఏఐ క్రియేషనా? అనేది ఈజీగా గుర్తించొచ్చు. యూజర్లు ఒకరిని చూసి మరొకరు అని పొరబడకుండా, సోషల్ మీడియాల్లో ట్రాన్స్పరెన్సీని పెంచడం ఈ మార్పు వెనుక ఉన్న ప్రధాన ఉద్దేశం. ఒకవేళ ఎవరైనా ఏఐతో క్రియేట్ చేసిన విషయాలను పంచుకుంటే, వాటిపై స్పష్టమైన గుర్తులు ఉండేలా ఈ సంస్థ కఠిన నిబంధనలు పెట్టింది.
దీనివల్ల సామాన్యులు తప్పుదారి పట్టకుండా జాగ్రత్త పడొచ్చు. ముఖ్యంగా నకిలీ ఖాతాల ద్వారా జరిగే ఆర్థిక లేదా వ్యక్తిగత ఇబ్బందులను తగ్గించడానికి ఈ కొత్త విధానం ఎంతో ఉపయోగకరంగా ఉంటుంది. టెక్నాలజీ వల్ల కలిగే అనర్థాల నుంచి యూజర్లను ప్రొటెక్ట్ చేయడమే దీని లక్ష్యం.
