కాంగ్రెస్ ప్రభుత్వం కార్మికులకు అండగా ఉంటుందన్నారు మంత్రి వివేక్ వెంకటస్వామి. కేంద్ర ప్రభుత్వం తెచ్చిన నాలుగు లేబర్ కోడ్స్ తెలంగాణలో అమలు చేయకుండా అసెంబ్లీలో తీర్మానం చేయాలని మంత్రి వివేక్ వెంకటస్వామికి వినతి పత్రం ఇచ్చాయి రాష్ట్ర కార్మిక సంఘాలు. సోమాజిగూడ మంత్రి నివాసంలో కలిసి వినతి పత్రం ఇచ్చారు కార్మిక సంఘాల నాయకులు. విదేశీ బహుళ జాతి సంస్థల ప్రయోజనాలు కాపాడేందుకు కేంద్రం ఈ బిల్లులు తెచ్చిందని మంత్రికి వివరించారు కార్మిక సంఘాలు.
తెలంగాణలో కోటి మందికి పైగా కార్మికులకు ఈ లేబర్ కోడ్లతో నష్టం జరుగుతుందని కార్మిక సంఘాలు మంత్రికి చెప్పారు. నాలుగు లేబర్ కోట్లను వ్యతిరేకిస్తూ ఇప్పటికే తమిళనాడు, కేరళ, పశ్చిమబెంగాల్ రాష్ట్రాలు అసెంబ్లీలో తీర్మానం చేశాయని మంత్రి దృష్టికి తీసుకుకొచ్చారు. కేంద్రంలోని బీజేపీ ప్రభుత్వం ఈజీ ఆఫ్ డూయింగ్ బిజినెస్ పేరుతో కార్మికులను మోసం చేస్తుందని విమర్శించారు. పనిగంటలను 8 నుంచి 12 గంటలకు పెంచుతూ శ్రమ దోపిడి చేస్తున్నారని మంత్రకి వివరించారు కార్మిక సంఘాలు. నాలుగు లేబర్ కోడ్లకు సంబంధించిన అంశాన్ని సీఎం దృష్టికి తీసుకెళ్తానని ఈ సందర్భంగా కార్మిక సంఘాలకు హామీ ఇచ్చారు మంత్రి వివేక్ వెంకటస్వామి.
