ఒక్క రెండు నిమిషాలు ఆక్సిజన్ లేకుండా బతకగలరా? చాలా కష్టం అంటారా! మామూలు మనిషి రెండు మూడు నిమిషాలు ఆక్సిజన్ లేకుండా ఉండడమంటే ఊపిరాగిపోవడమే. కానీ, బ్రిటన్కు చెందిన క్రిస్ లెమన్స్ అనే డైవర్ 38 నిమిషాల పాటు సముద్రంలో 300 అడుగుల లోతులో ఆక్సిజన్ లేకుండా బతికి బట్టగట్టాడు. 2012 సెప్టెంబర్లో నార్త్ సీలో జరిగిన ఆ ఘటనపైనే ఇప్పుడు బీబీసీ ‘లాస్ట్ బ్రెత్’ పేరిట డాక్యుమెంటరీ తీసింది. 2012 సెప్టెంబర్ 18న క్రిస్ లెమన్స్, డేవ్ యువాసా, డంకన్ అల్కాక్ మరో ఇద్దరు డైవర్లు అబర్దీన్కు 204 కిలోమీటర్ల దూరంలో నార్త్ సీలోపలకి డైవ్ చేయాల్సి ఉంది. వాళ్లకు సపోర్ట్గా బిబ్బీ టోపజ్ అనే నావ ఒడ్డున ఉంది. కానీ, లెమన్స్, యువాసా మాత్రమే డైవ్ చేశారు. అంతలోనే వాళ్లకు అనుకోని చేదు అనుభవం ఎదురైంది. ఆ నావ కంప్యూటర్ ఫెయిలవడం వల్ల బిబ్బీ టోపాజ్ డ్రిఫ్ట్ అవడం మొదలుపెట్టింది. యువాసా, లెమన్స్ ఒకేసారి డెక్పైకి రావాల్సిందిగా అలారం మోగింది.
చిన్నచిన్నగా టోపాజ్ అక్కడి నుంచి దూరంగా వెళ్లడం మొదలెట్టింది. ఇటు యువాసా, లెమన్స్లు పైకి వచ్చే ప్రయత్నం చేస్తున్నారు. లెమన్స్ డైవింగ్ సూట్లోని అన్నీ ఫెయిలయ్యాయి. అందరితోనూ కనెక్షన్ కట్ అయిపోయింది. సముద్రం అడుగుకు వెళ్లిపోయాడు. లెమన్స్ కోసం వెంటనే సెర్చ్ చేయడం మొదలుపెట్టారు. ఎమర్జెన్సీ ట్యాంకుల్లోని ఆక్సిజన్తో మహా అయితే 8 నిమిషాలు అతడు బతకగలడని అంచనా వేశారు. ఇక, ఆ నీటి చీకట్లలో ఆయిల్ బావి వద్ద ఉండే ఓ చిన్న షెల్ఫు అతడి బతుకుపై ఆశ రేపింది. కానీ, ఆ చీకట్లో దారి తప్పితే మరిన్ని కష్టాలు ఎదురు కావొచ్చన్న ఆందోళనా మొదలైంది. ఎలాగో అలా ఆ షెల్ఫ్ దగ్గరకి వెళ్లాడు లెమన్స్. అప్పటికే ఆక్సిజన్ అంతా అయిపోయింది. శ్వాస అందట్లేదు. అచేతనంగా అతడు పడిపోయాడు. సెర్చ్ ఆపరేషన్ చేస్తున్న తోటి డైవర్లకు సెన్సర్ల ద్వారా షెల్ఫ్ మీద పడి ఉన్న లెమన్స్ కనిపించాడు. అంతా చనిపోయాడనే అనుకున్నారు. పైకి తీసుకొచ్చారు. రెండు మూడు సార్లు అతడికి నోటి ద్వారా ఊపిరందించే ప్రయత్నం చేశారు. అతడి లేచి కూర్చున్నాడు. అయితే, ఆక్సిజన్ అనేదే లేకుండా 38 నిమిషాల పాటు అతడెలా బతకగలిగాడన్నదే వాళ్లను తొలిచేసిన ప్రశ్న.