ఓటీటీలోకి మలయాళ సై ఫై థ్రిల్లర్ ‘మస్తిష్క మరణం’.. స్ట్రీమింగ్ ఎక్కడంటే?

మలయాళ చిత్ర పరిశ్రమ  ఎప్పుడూ వైవిధ్యమైన కథాంశాలతో ప్రయోగాలు చేస్తూనే ఉంటుంది. ఈ క్రమంలోనే భారీ అంచనాల మధ్య విడుదలైన అంబిషీయస్ సైన్స్ ఫిక్షన్ సైబర్ పంక్ థ్రిల్లర్ ‘మస్తిష్క మరణం’ (Masthishka Maranam). ఆర్కే కృష్ణన్ దర్శకత్వంలో రూపొందిన ఈ చిత్రం, థియేటర్లలో ఆశించిన స్థాయిలో మెప్పించలేకపోయినప్పటికీ, ఇప్పుడు డిజిటల్ తెరపై తన అదృష్టాన్ని పరీక్షించుకోవడానికి సిద్ధమైంది.

ఓటీటీపై ఆశలు..

ఫిబ్రవరి 27, 2026న విడుదలైన ‘మస్తిష్క మరణం’ చిత్రం మలయాళంలో ఒక సరికొత్త ప్రయోగంగా నిలిచింది. హాలీవుడ్ తరహా సైబర్ పంక్ ఎలిమెంట్స్, మెడికల్ థ్రిల్లర్ అంశాలతో కూడిన ఈ సినిమాపై రిలీజ్ ముందు భారీ హైప్ నెలకొంది. అయితే, సామాన్య ప్రేక్షకులకు అర్థం కాని క్లిష్టమైన స్క్రీన్ ప్లే, నెమ్మదించిన కథనం కారణంగా బాక్సాఫీస్ వద్ద ఈ సినిమా చతికిలబడింది. కోట్లు వెచ్చించి తీసిన ఈ భారీ బడ్జెట్ మూవీకి థియేట్రికల్ రన్‌లో ఆశించిన వసూళ్లు రాకపోవడం చిత్ర యూనిట్‌ను కొంత నిరాశకు గురిచేసింది.

స్ట్రీమింగ్ ఎప్పుడంటే?

థియేటర్లలో మిస్ అయిన ప్రేక్షకులకు ఇప్పుడు ఒక గొప్ప అవకాశం దక్కింది. ప్రముఖ ఓటీటీ దిగ్గజం నెట్‌ఫ్లిక్స్ (Netflix) ఈ సినిమా డిజిటల్ హక్కులను సొంతం చేసుకుంది. మార్చి 27, 2026 నుండి ఈ చిత్రం స్ట్రీమింగ్ కానున్నట్లు అధికారిక ప్రకటన వెలువడింది. సాధారణంగా ఇలాంటి సైన్స్ ఫిక్షన్ సినిమాలు థియేటర్ల కంటే ఓటీటీలోనే ఎక్కువ ఆదరణ పొందుతుంటాయి. మరి నెట్‌ఫ్లిక్స్ వేదికగా ఈ 'మస్తిష్క మరణం' ఎలాంటి రికార్డులు సృష్టిస్తుందో చూడాలి.

►ALSO READ | Anna Konidela: నమ్రత, ఉపాసన బాటలో అన్నా కొణిదెల.. పవన్ కళ్యాణ్ క్రియేటివ్ వర్క్స్ బాధ్యతలు ఆమెకే!

మల్టీ లాంగ్వేజ్ వెర్షన్లపై సస్పెన్స్!

ఈ మూవీలో రజిషా విజయన్, నిరంజ్ మణియంపిళ్ల రాజు, జగదీష్, దివ్య ప్రభ, సురేష్ కృష్ణ, రాహుల్ రాజగోపాల్ , విష్ణు అగస్త్య ప్రధాన పాత్రలు పోషించారు. దర్శకుడు ఆర్కే కృష్ణన్ తనదైన శైలిలో ఫ్యూచరిస్టిక్ థ్రిల్లర్‌గా మలిచారు.  వర్కీ అందించిన బ్యాక్ గ్రౌండ్ స్కోర్ సినిమాకు ప్రధాన బలం. వినాయక అజిత్ భారీ ఖర్చుతో ఈ చిత్రాన్ని నిర్మించారు.

ప్రస్తుతానికి ఈ సినిమా మలయాళంలో మాత్రమే స్ట్రీమింగ్ అవుతుందా? లేక తెలుగు, తమిళ, హిందీ భాషల్లో కూడా అందుబాటులోకి వస్తుందా? అనే విషయంపై ఇంకా స్పష్టత లేదు. ఒకవేళ మల్టీ-లాంగ్వేజ్ వెర్షన్లు రిలీజ్ అయితే, ఈ సినిమా రీచ్ పాన్-ఇండియా స్థాయిలో పెరిగే అవకాశం ఉంది. ప్రత్యేకించి సైన్స్ ఫిక్షన్ ప్రియులు ఈ సినిమా కోసం ఆసక్తిగా ఎదురుచూస్తున్నారు.