- వనదేవతల పండుగ సంప్రదాయంగా నిర్వహించిన పూజారులు
- చీడపీడలు సోకకుండా గ్రామ పొలిమేరల్లో తోరణాలు ఏర్పాటు
- వన దేవతలకు మొక్కులు.. రాత్రంతా జాగరణ
తాడ్వాయి, వెలుగు : మేడారంలో వన దేవతల మండ మెలిగే పండుగ అంగరంగ వైభవంగా జరిగింది. బుధవారం ఉదయం సమ్మక్క పూజరులు సిద్దబోయిన, కొక్కెర, మల్లెల వంశీయులు, సారలమ్మ పూజారులు కాక వంశీయులు తమ ఇండ్లను ముందుగా శుభ్రం చేసుకున్నారు. అనంతరం కుటుంబాలు స్నానాలు చేశాయి.
మేడారం వెళ్లి సమ్మక్క గుడిని, కన్నెపెల్లి వెళ్లి సారలమ్మ గుడిని పూజారులు గోదావరి జలాలతో శుద్ధి చేశారు. అనంతరం సమ్మక్క పూజారి సిద్ధబోయిన నితిన్, సారలమ్మ పూజారి కాక సారయ్య ఇండ్ల వద్ద డోలు వాయిద్యాల నడుమ మామిడాకు తోరణాలను తయారు చేశారు. అక్కడినుంచి పూజారులు, ఆడపడుచులు(ఆడబిడ్డలు) మంగళ హారతులతో పూజా సామగ్రిని అమ్మవార్ల గుడులకు చేరారు.
అడవి నుంచి తెచ్చిన పుట్ట మన్నుతో ఆడబిడ్డలు గుడులను అలికి ముగ్గులు వేశారు. అనంతరం పూజారులు డోలు వాయిద్యాల నడుమ బొడ్రాయి, ముత్యాలమ్మ, భూలక్ష్మి, మహాలక్ష్మికి నూతన వస్త్రాలు, పసుపు, కుంకుమ పెట్టి కొబ్బరికాయలు కొట్టి పవిత్ర పూజలు చేశారు.
అక్కడ నుంచి నేరుగా ఆలయం ముందు బురికా స్తంభాలతో చీడపీడలు రాకుండా కోడిపిల్ల, సొరకాయ, మిరపకాయ, మామిడి, వేప మండలతో తోరణం కట్టారు. అనంతరం గ్రామ పొలిమేరల్లో బూరిక చెట్లతో తోరణాలు ఏర్పాటు చేశారు.
ఆ తర్వాత ఆలయంలో పూజారులు పవిత్ర పూజలు చేశారు. సాయంత్రం డోలు వాయిద్యాల నడుమ గద్దెల వద్దకు చేరుకొని రహస్య పూజలు చేశారు. ఇక రాత్రంతా జాగరణ చేశారు. దీంతో మహాజాతరకు అంతా సిద్ధమని పూజారులు తెలిపారు.
