- యూనివర్సిటీలోని క్వార్టర్స్లో చాలా సేపు సోదాలు
- ప్రశ్నిస్తున్నందుకే తప్పుడు కేసులు: వామపక్షాల మండిపాటు
సిద్దిపేట/ హైదరాబాద్, వెలుగు:
ఉస్మానియా యూనివర్సిటీ తెలుగు శాఖ అసోసియేట్ ప్రొఫెసర్ సి.కాశింను పోలీసులు శనివారం అరెస్టు చేశారు. ఉదయం ఆరున్నరకు పోలీసులు వర్సిటీలోని కాశిం క్వార్టర్స్‌కు వచ్చారు. తలుపులు తీయాలని కోరగా వర్సిటీ క్వార్టర్స్లో ఉంటున్నామని, వర్సిటీ వీసీ, రిజిస్ట్రార్ పర్మిషన్ చూపించాలని కాశిం, ఆయన భార్య స్నేహలత కోరారు. కానీ పోలీసులు బలవంతంగా ఇంట్లోకి వెళ్లారు. ఐదు గంటల పాటు సెర్చ్ చేసి, హార్డ్డిస్క్తో పాటు కొన్ని పుస్తకాలను స్వాధీనం చేసుకున్నారు. తర్వాత కాశింను అదుపులోకి తీసుకుని, తమ వెంట తీసుకెళ్లారు. ఓయూ స్టూడెంట్స్ ఆందోళనకు దిగడంతో.. పలువురిని అరెస్టు చేశారు. కాశింను హైదరాబాద్ నుంచి సిద్దిపేట జిల్లా ములుగు పోలీస్స్టేషన్‌కు, తర్వాత గజ్వేల్ పోలీస్స్టేషన్ కు తీసుకెళ్లారు. సుమారు ఆరు గంటల పాటు విచారించారు. రాత్రి ఎనిమిది గంటలకు గజ్వేల్ మున్సిఫ్ కోర్టు న్యాయమూర్తి ముందు హాజరుపర్చారు. ఆయన ఆదేశాల మేరకు జ్యుడీషియల్ రిమాండ్ కు తరలించారు.
మావోయిస్టులతో సంబంధాలతో: సిద్దిపేట సీపీ
కాశిం కేసుకు సంబంధించిన వివరాలతో సిద్దిపేట సీపీ జోయల్ డేవిస్ఒక ప్రకటన విడుదల చేశారు. ‘‘ప్రొఫెసర్ కాశింకు సీపీఐ మావోయిస్టు తెలంగాణ కార్యదర్శి జగన్, ఇతర నేతలతో సంబంధాలున్నాయి. మావోయిస్టు సెంట్రల్ కమిటీ ఇచ్చే డబ్బులతో తెలంగాణలో మావోయిస్టు కార్యకలాపాలు నిర్వహిస్తున్నారు. కాశింపై వివిధ జిల్లాల్లో ఆరు కేసులు నమోదై ఉన్నాయి. దీంతో హుస్నాబాద్, గజ్వేల్, గౌరారం పోలీసులు కాశిం ఇంట్లో తనిఖీలు చేసి అరెస్టు చేశారు” అని పేర్కొన్నారు.
ప్రశ్నిస్తున్నందుకే తప్పుడు కేసులు
ప్రశ్నిస్తున్నందుకే కాశింపై తప్పుడు కేసులు పెట్టారని ఆయన భార్య స్నేహలత ఆరోపించారు. నాలుగేండ్ల కిందట ఓ వ్యక్తి దగ్గర కొన్ని పుస్తకాలు దొరికాయని అక్రమ కేసు నమోదు చేశారని, ఇన్నేండ్ల తర్వాత అరెస్టు చేయడంపై అనుమానాలు వ్యక్తమవుతున్నాయన్నారు. ప్రొఫెసర్ కాశింపై పెట్టిన కేసులను ఎత్తివేయాలని ప్రొఫెసర్ హరగోపాల్ డిమాండ్ చేశారు. ఓయూలో రెగ్యులర్గా డ్యూటీ చేస్తున్న ప్రొఫెసర్ను ఇలా అరెస్టు చేయడం పౌరహక్కులను కాలరాయడమేనని సీపీఎం, సీపీఐ రాష్ట్ర కార్యదర్శులు తమ్మినేని వీరభద్రం, చాడ వెంకటరెడ్డి మండిపడ్డారు. నిర్భంధాలు, అరెస్టులు దారుణమన్నారు. పలు వామపక్ష సంఘాలు కూడా కాశిం అరెస్టును ఖండించాయి.
