నిజామాబాద్లో రియలర్ట్ సూర్యప్రకాష్ కుటుంబ సభ్యుల ఆత్మహత్యలపై పోలీసులు విచారణను మరింత వేగవంతం చేశారు. తన చావుకు ముగ్గురు వ్యక్తులే కారణమంటూ సూర్యప్రకాష్ సూసైడ్ నోట్ లో పేర్కొన్నారు. ప్రస్తుతం V6 చేతికి ఆ సూసైడ్ నోట్ అందింది. ‘‘నా బిజినెస్ పార్ట్నర్స్ వెంకట సందీప్ , కళ్యాణ్ చక్రవర్తి , కిరణ్ కుమార్ నన్ను చాలా ఇబ్బందులు పెట్టారు. నన్ను రౌడీలతో కొట్టించారు. నా పరువు మొత్తం తీయడం వల్లే సూసైడ్ చేసుకుంటున్నాం. పోలీసులు న్యాయం చేయాలి’’ అని సూసైడ్ నోట్ రాసి ఆత్మహత్య చేసుకున్నారు.
శంకరపల్లిలో వేసిన వెంచర్ విషయంలో సూర్యప్రకాష్ తో వెంకట సందీప్ , కిరణ్ కుమార్, కళ్యాణ్ చక్రవర్తి గొడవ పెట్టుకున్నారని పోలీసులు తేల్చారు. సూర్యప్రకాష్ రాసిన సూసైట్ నోట్ ఆధారంగా పోలీసులు అన్ని కోణాల్లో కేసు దర్యాప్తు చేస్తున్నారు. సూర్యప్రకాష్ ఆత్మహత్యకు కారణమైన ముగ్గురిలో ఒకరు హైదరాబాద్, మరొకరు నిజామాబాద్, ఇంకొకరు విజయనగరం జిల్లాకు చెందిన వ్యక్తులుగా గుర్తించారు. ప్రస్తుతం ఈ ముగ్గురు వ్యక్తుల్లో ఒకరి బంధువైన పోలీసు ఉన్నతాధికారి పాత్రపైనా అన్ని కోణాల్లో పోలీసులు విచారణ జరుపుతున్నారు.
బిజినెస్ భాగస్వాముల ఒత్తిడి
సూర్యప్రకాశ్, అక్షయ దంపతులకు ప్రత్యూష, కుమారుడు అద్వైత్‌ ఉన్నారు. సూర్యప్రకాశ్ కొన్నేళ్లు ఆదిలాబాద్ లోనే హార్డ్ వేర్ షాప్ తో పాటు పెట్రోల్ బంక్ నడిపించాడు. అయితే నాలుగేళ్ల క్రితం అక్కడి ఆస్తులన్నీ అమ్ముకొని కుటుంబంతో సహా హైదరాబాద్ కు షిఫ్ట్ అయ్యాడు. నగర శివార్లలో రియల్ ఎస్టేట్ వ్యాపారం మొదలుపెట్టాడు. లాక్ డౌన్ టైమ్ లో కొన్నిచోట్ల వెంచర్లు వేయగా, పెద్ద ఎత్తున నష్టం వచ్చింది. దీంతో తాము పెట్టిన పెట్టుబడి తిరిగి ఇవ్వాలంటూ బిజినెస్ భాగస్వాములు సూర్యప్రకాశ్ పై ఒత్తిడి తెచ్చారు. అప్పులు చేసి కొంత మొత్తం చెల్లించినా, మిగతావి ఇవ్వాలని వేధింపులకు గురి చేశారు.
17 రోజులుగా హోటల్లోనే మకాం...
పార్ట్నర్ల వేధింపులు ఎక్కువ కావడంతో ఆత్మహత్య చేసుకోవాలని నిర్ణయించుకున్న సూర్యప్రకాష్.. ఈ నెల 4వ తేదీన కుటుంబంతో సహా నిజామాబాద్ కు వచ్చి ఓ హోటల్ లో దిగాడు. అప్పటి నుంచి కుటుంబంతో అందులోనే ఉంటున్నాడు. రెండు, మూడ్రోజుల క్రితం నిజామాబాద్లో ఉంటున్న తమ బంధువుల ఇంట్లో జరిగిన సత్యనారాయణ వ్రతానికి కుటుంబంతో సహా హాజరయ్యాడు. ఈ క్రమంలో సూర్యప్రకాశ్ శనివారం రాత్రి 8 గంటలకు భార్య, పిల్లలకు కేక్ లో విషం కలిపి తినిపించాడు. వాళ్లందరూ చనిపోయారని నిర్ధారించుకున్నాక హోటల్ రూమ్ లోని సీలింగ్‌ ఫ్యాన్‌కు తానూ ఉరేసుకున్నాడు.
ఆదివారం రూమ్ లో నుంచి ఎవరూ బయటకు రాకపోవడం..కాలింగ్ బెల్ కొట్టినా, ఫోన్ చేసినా స్పందించకపోవడంతో అనుమానం వచ్చిన హోటల్ సిబ్బంది పోలీసులకు సమాచారం ఇచ్చారు. వాళ్లు వచ్చి డోర్ తెరిచి చూడగా అందరూ చనిపోయి కనిపించారు. సూర్యప్రకాశ్ దగ్గర సూసైడ్ నోట్ దొరికింది. తన రియల్ఎస్టేట్ వ్యాపారంలో పార్టనర్లుగా ఉన్న కిరణ్కుమార్, వెంకట సందీప్,కళ్యాణ్ చక్రవర్తి అనే ముగ్గురు వ్యక్తుల వల్లే తాము ఆత్మహత్య చేసుకుంటున్నామని సూసైడ్ నోట్ లో రాసి ఉంది. దీంతో వారిద్దరిపై కేసు నమోదు చేసి దర్యాప్తు చేస్తున్నామని నిజామాబాద్ ఏసీపీ వెంకటేశ్వర్లు చెప్పారు.
