స్టాక్ మార్కెట్లు ఓలటాలిటీని ఎదుర్కొంటున్న ప్రస్తుత పరిస్థితుల్లో.. ఇన్వెస్టర్లు ప్రత్యామ్నాయ పెట్టుబడి మార్గాలపై దృష్టి సారిస్తున్నారు. మార్కెట్ ఒడిదుడుకులతో సంబంధం లేకుండా స్థిరమైన రాబడిని కోరుకునే వారికి స్మాల్ సేవింగ్ స్కీమ్స్, ఫిక్సెడ్ డిపాజిట్లు చక్కటి అవకాశాలుగా నిలుస్తున్నాయి. ముఖ్యంగా రూ.9 లక్షల పెట్టుబడితో ప్రతి నెలా రెగ్యులర్ ఆదాయాన్ని పొందాలనుకునే వారికి పోస్ట్ ఆఫీస్ మంత్లీ ఇన్‌కమ్ స్కీమ్, బ్యాంక్ ఎఫ్‌డీల మధ్య ఉన్న రాబడి తేడాలను తెలుసుకోవడం ముఖ్యం.
ప్రస్తుతం పోస్ట్ ఆఫీస్ మంత్లీ ఇన్‌కమ్ స్కీమ్‌పై ప్రభుత్వం 7.4 శాతం వడ్డీని అందిస్తోంది. ఈ లెక్కన రూ.9 లక్షలు ఇన్వెస్ట్ చేస్తే ప్రతి నెలా రూ.5వేల 550 చొప్పున ఏడాదికి రూ.66వేల 600 ఆదాయం లభిస్తుంది. అదే సమయంలో సాధారణ బ్యాంక్ ఎఫ్‌డీలపై సగటున 6.5 శాతం వడ్డీ లభిస్తుందని అంచనా వేస్తే.. దీని ద్వారా నెలకు రూ.4వేల 875, ఏడాదికి రూ.58వేల 500 మాత్రమే వస్తుంది. అంటే పోస్ట్ ఆఫీస్ పెట్టుబడి ద్వారా బ్యాంక్ ఎఫ్‌డీ కన్నా నెలకు అదనంగా రూ.675, ఏడాదికి రూ.8వేల 100 వరకు ఎక్కువ లాభం పొందొచ్చు.
పోస్ట్ ఆఫీస్ పథకం కాలపరిమితి కచ్చితంగా 5 సంవత్సరాలుగా ఉంటుంది. సింగిల్ అకౌంట్ ద్వారా గరిష్టంగా రూ.9 లక్షల వరకు, జాయింట్ అకౌంట్ ద్వారా రూ.15 లక్షల వరకు పెట్టుబడి పెట్టే అవకాశం ఉంది. ఒకవేళ అత్యవసర పరిస్థితుల్లో ముందుగా డబ్బు వెనక్కి తీసుకోవాలంటే.. ఏడాది లోపు అనుమతి ఉండదు. ఒక సంవత్సరం దాటిన తర్వాత 3 ఏళ్లలోపు విత్ డ్రా చేస్తే అసలులో 2 శాతం, మూడేళ్ల నుంచి మెచ్యూరిటీ లోపు అయితే 1 శాతం వడ్డీ కోత విధిస్తారు.
ఇక బ్యాంక్ ఎఫ్‌డీల విషయానికి వస్తే.. సీనియర్ సిటిజన్లకు స్మాల్ ఫైనాన్స్ బ్యాంక్ ల్లో కొన్ని ప్రత్యేక కాలపరిమితులపై 8 శాతానికి పైగా వడ్డీ లభిస్తుంది. అయితే సామాన్య పౌరులకు అందించే సాధారణ ఎఫ్‌డీ వడ్డీ రేట్లతో పోలిస్తే ప్రస్తుతం పోస్ట్ ఆఫీస్ మంచి నెలవారీ ఆదాయాన్ని అందిస్తోంది. ఒకేసారి పెద్ద మొత్తంలో ఇన్వెస్ట్ చేసి.. ఎలాంటి రిస్క్ లేకుండా ప్రత్యామ్నాయంగా ప్రతి నెలా ఖర్చుల కోసం ఆదాయం కావాలనుకునే వారికి పోస్ట్ ఆఫీస్ స్కీమ్ బెస్ట్ ఛాయిస్ అని చెప్పుకోవాలి.
