ప్రముఖ నటి,రాజకీయ నాయకురాలు రాధిక శ‌ర‌త్ కుమార్ తీవ్ర అస్వస్థతకు గురయ్యారని సమాచారం. మొదట సాధారణ జ్వరమని చెన్నైలోని ఓ ప్రైవేట్ హాస్పిటల్లో రాధిక జాయిన్ అవ్వగా.. వైద్య పరీక్షల అనంతరం డెంగ్యూ సోకినట్టు నిర్ధారణ అయ్యిందని సినీ వర్గాలు వెల్లడించాయి.
అయితే, గురువారం (జులై28న) ఆమెను హాస్పిటల్లో చేర్చగా.. ఈ విషయం ఆలస్యంగా వెలుగులోకి వచ్చింది. ప్రస్తుతం ప్రత్యేక వైద్యుల పర్యవేక్షణలో రాధికకు ట్రీట్మెంట్ జరుగుతుందని సినీ వర్గాలు తెలిపాయి.
ఈ క్రమంలో రాధిక హెల్త్ కండిషన్ గురుంచి ఆమె అభిమానుల్లో ఆందోళన పెరిగింది. ప్రస్తుతం రాధిక హెల్త్ బాగానే ఉన్నా, ఆగస్టు 5 వరకు ఆసుపత్రిలోనే ఉండాలని వైద్యులు సూచించారు. ఆ తర్వాతే హాస్పిటల్ నుండి డిశ్చార్జ్ చేసే అవకాశం ఉంది. అభిమానులు, సహచరులు ఆమె త్వరగా కోలుకోవాలని ప్రార్థిస్తున్నారు.
రాధిక శరత్‌కుమార్ తెలుగు, తమిళ, కన్నడ, మలయాళ భాషల్లో సినిమాలు చేసి మంచి గుర్తింపు సంపాదించుకుంది. తెలుగులోనే ఆమె ఎక్కువ సినిమాలు చేసి సినీ ప్రియులకు ఎంతో దగ్గరైంది. మెగాస్టార్ చిరంజీవితో కలిసి దాదాపు 15కి పైగా సినిమాల్లో జంటగా నటించి మెప్పించింది. మరోవైపు, రాధికా నటిగా కొనసాగుతూనే.. నిర్మాతగా కూడా పలు విజయవంతమైన టీవీ సీరియల్స్ నిర్మించింది. అలాగే రాజకీయాల్లోకి ఎంట్రీ ఇచ్చి తనదైన ముద్ర వేసింది.
