- అడ్డుకున్న కుటుంబ సభ్యులు, కార్యకర్తలు
- కరీంనగర్లో ఎంపీ ఇంటి వద్ద తీవ్ర ఉద్రిక్తత
కరీంనగర్, వెలుగు: బీజేపీ రాష్ట్ర అధ్యక్షుడు బండి సంజయ్ను పోలీసులు అరెస్ట్ చేశారు. మంగళవారం అర్ధరాత్రి 12 గంటలు దాటాక కరీంనగర్లోని సంజయ్ ఇంటిని చుట్టుముట్టిన పోలీస్ బలగాలు.. ఆయనను బలవంతంగా అదుపులోకి తీసుకున్నాయి. తనను ఏ కేసులో అరెస్టు చేస్తున్నారో చెప్పాలని, వారెంట్ లేకుండా ఎలా అరెస్టు చేస్తున్నారని సంజయ్ ప్రశ్నించినా వినిపించుకోలేదు.ఆయనను బలవంతంగా లాక్కెళ్లారు.
సంజయ్ను తీసుకెళ్లకుండా కుటుంబ సభ్యులు, కార్యకర్తలు పోలీసులను అడ్డుకున్నారు. పోలీసులకు వ్యతిరేకంగా నినాదాలు చేస్తూ వారితో వాగ్వాదానికి దిగారు. కార్యకర్తలను పోలీసులు ఈడ్చిపడేయడంతో తీవ్ర ఉద్రిక్తత ఏర్పడింది. సంజయ్ అత్తమ్మ చనిపోయి బుధవారానికి 9వ రోజు కావడంతో.. ఆ కార్యక్రమంలో పాల్గొనేందుకు ఇంటికి చేరుకున్న కొద్దిసేపటికే ఈ ఘటన జరిగింది. పేపర్ లీకేజీ విషయంలో బుధవారం ఉదయం 9 గంటలకు ప్రెస్ మీట్ పెట్టేందుకు సంజయ్ సిద్ధం కావడంతో ఆయనను పోలీసులు అర్ధరాత్రే అరెస్ట్ చేశారని తెలిసింది.
