గత 25 రోజులుగా ఆమరణ నిరాహార దీక్ష చేస్తున్న ప్రముఖ సామాజికవేత్త సోనమ్ వాంగ్చుక్.. కీలక షరతులతో కేంద్ర ప్రభుత్వానికి లేఖ రాశారు. చలో సంసద్' నిరసనలో పాల్గొన్న విద్యార్థులు, ఆందోళనకారులపై ఎలాంటి చట్టపరమైన లేదా శిక్షాత్మక చర్యలు తీసుకోబోమని ప్రభుత్వం స్పష్టమైన హామీ ఇస్తేనే తన దీక్షను విరమిస్తానని ప్రకటించారు. ఎలాంటి హామీ ఇవ్వకపోతే దీక్ష కొనసాగిస్తానని స్పష్టం చేశారు వాంగ్ చుక్.
గుర్గావ్లోని మేదాంత ఆసుపత్రిలో చికిత్స పొందుతున్న వాంగ్చుక్ను కలిసిన కేంద్ర మంత్రులు జేపీ నడ్డా, జితేంద్ర సింగ్... దీక్ష విరమించాలని విజ్ఞప్తి చేశారని తెలిపారు. పేపర్ లీకేజీల వల్ల ఆత్మహత్య చేసుకున్న విద్యార్థుల కుటుంబాలకు తగిన పరిహారం ఇవ్వడం, అలాగే విద్యాశాఖ మంత్రి ధర్మేంద్ర ప్రధాన్ రాజీనామాతో సహా బాధ్యతారాహిత్యంపై పార్లమెంటులో చర్చించడం వంటి డిమాండ్లపై సానుకూలంగా స్పందిస్తామని మంత్రులు హామీ ఇచ్చారని చెప్పారు.
అయితే శాంతియుతంగా నిరసన తెలిపిన విద్యార్థులపై పోలీసులు బలప్రయోగానికి దిగారని వాంగ్చుక్ ఆరోపించారు. 65 మంది ఎంపీలు తనను కలిసి దీక్ష విరమించాలని కోరినప్పటికీ... విద్యార్థుల భవిష్యత్తును ప్రమాదంలో పడేసి తాను వెనక్కి తగ్గలేనని స్పష్టం చేశారు. న్యాయమైన విద్యావ్యవస్థ కోసం గళమెత్తిన యువతపై ఎలాంటి వేధింపులు ఉండవని ప్రభుత్వం ప్రకటిస్తే క్షణాల్లో దీక్ష విరమిస్తానని... లేకపోతే అమరణ దీక్షను కొనసాగిస్తానని సోనమ్ వాంగ్చుక్ హెచ్చరించారు.
నీట్ పేపర్ లీకేజీకి నిరసనగా జూన్ 6న జంతర్ మంతర్ వద్ద కాక్రచో జనతా పార్టీ వ్యవస్థాపకుడు అభిజీత్ దీప్కే ఈ ఆందోళనను ప్రారంభించారు. జూన్ 28న సోనమ్ వాంగ్చుక్ కూడా ఈ నిరసనలో చేరి ఆమరణ దీక్ష చేపట్టడంతో ఈ ఉద్యమం మరింత ఊపందుకుంది.
నీట్ పేపర్ లీకేజీకి బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ తక్షణమే రాజీనామా చేయాలని... అలాగే ఈ ఘటనతో మనస్తాపం చెంది ఆత్మహత్య చేసుకున్న విద్యార్థుల కుటుంబాలకు కోటి రూపాయల పరిహారం చెల్లించాలని నిరసనకారులు తీవ్రంగా డిమాండ్ చేస్తున్నారు. ఈ క్రమంలో జూలై 18న అంటే 21వ రోజున జంతర్ మంతర్ వద్ద ఉన్న సోనమ్ వాంగ్చుక్ను ఢిల్లీ పోలీసులు బలవంతంగా తొలగించి సఫ్దర్జంగ్ ఆసుపత్రికి తరలించారు.
అయితే, సఫ్దర్జంగ్ ఆసుపత్రిలో ఆయనకు అందిస్తున్న చికిత్స సరిగ్గా లేదంటూ వాంగ్చుక్ భార్య గీతాంజలి జె ఆంగ్మో కోర్టును ఆశ్రయించారు. దీనిపై విచారణ జరిపిన కోర్టు... మంగళవారం కీలక ఆదేశాలు జారీ చేస్తూ, వాంగ్చుక్ను తక్షణమే గురుగ్రామ్లోని మేదాంత ఆసుపత్రికి తరలించేందుకు అనుమతివ్వడంతో అక్కడికి తరలించారు. ఈ క్రమంలో ఇవాళ ఆస్పత్రి నుంచే కేంద్రానికి లేఖ రాశారు వాంగ్ చుక్ .
