నేరడిగొండ , వెలుగు: తల్లిదండ్రులకు మించిన దైవం లేదని , వారిని పూజిస్తే దేవుడిని పూజించినట్లేనని నేరడిగొండ మండలం బుగ్గారంలోని ట్రైబల్ వెల్ఫేర్ రెసిడెన్షియల్ జూనియర్ కాలేజీ ప్రిన్సిపాల్ కృష్ణవేణి అన్నారు.
తల్లిదండ్రులకు పాదపూజ కార్యక్రమాన్ని శుక్రవారం నిర్వహించారు. ఈ సందర్భంగా ప్రిన్సిపాల్ మాట్లాడుతూ.. విద్యార్థులకు నైతిక విలువలతో కూడిన విద్యనందించడంతోపాటు, సామాజిక స్పృహ ఉన్న కార్యక్రమాలు చేపట్టాల్సిన అవసరం ఎంతైనా ఉందన్నారు.
నేటితరం యువతలో తల్లిదండ్రులను చులకనగా చూసే భావన పెరిగిపోయిందని, దానిని నివారించడానికే ఇలాంటి కార్యక్రమం చేపట్టినట్లు తెలిపారు. ఈ సందర్భంగా విద్యార్థులు తమ తల్లిదండ్రుల పాదాలకు అభిషేకం చేసి పూలతో అలంకరించి పాదపూజ చేశారు.
