తెలంగాణ వైతాళికుడు, ప్రముఖ స్వతంత్ర సమరయోధుడు, సంపాదకుడు సురవరం ప్రతాప రెడ్డి జీవితం ఆధారంగా రూపొందించిన చిత్రం ‘సురవరం’. సురవరం ప్రతాప్ రెడ్డి సాహితి వైజయంతి ట్రస్ట్ నిర్మించిన ఈ చిత్రానికి బి.ఏం.రెడ్డి, జి. హర్షవర్ధన్ రాయల్ దర్శకత్వం వహించారు. మంగళవారం ఈ చిత్రాన్ని ప్రసాద్ ల్యాబ్స్లో ప్రదర్శించారు.
ముఖ్యఅతిథిగా హాజరైన మాజీ మంత్రి వి. శ్రీనివాస్ గౌడ్ మాట్లాడుతూ.. ‘సురవరం ప్రతాపరెడ్డి జీవిత చరిత్ర ఆధారంగా ఈ సినిమా తీయడం స్ఫూర్తిదాయకం’ అని అన్నారు. నాటి చరిత్ర తెలుసుకునేందుకు నేటి తరం ఈ సినిమా చూడాలని మరో అతిథి శేఖర్ కమ్ముల అన్నారు. దర్శకనిర్మాతలతో పాటు సురవరం కుటుంబ సభ్యులు డా. సురవరం కృష్ణవర్ధన్ రెడ్డి, సురవరం అనిల్ కుమార్ రెడ్డి, సురవరం కపిల్, సురవరం గిరిధర్ రెడ్డి తదితరులు పాల్గొన్నారు.
