న్యూఢిల్లీ, వెలుగు: టీమిండియా మాజీ కెప్టెన్‌, హెచ్సీఏ మాజీ అధ్యక్షుడు మహ్మద్‌ అజరుద్దీన్‌‌‌‌కు సుప్రీం కోర్టులో ఎదురుదెబ్బ తగిలింది. ఈ నెల 20న జరిగే హెచ్సీఏ ఎన్నికల్లో తన ఓటు హక్కును వినియోగించుకునేందుకు అవకాశం కల్పించాలన్న అజర్ అభ్యర్థనను జస్టిస్‌ సంజయ్‌ కిషన్‌ కౌల్‌, జస్టిస్‌ సుధాంశు ధూలియాతో కూడిన ధర్మాసనం తోసిపుచ్చింది. ఇప్పటికే ఓటర్ల జాబితా ఫైనల్‌ అయినందున ఈ వ్యవహారంలో తాము జోక్యం చేసుకోబోమని స్పష్టం చేసింది.
ఈ కేసును ఈ నెల 31కి వాయిదా వేసింది. హెచ్సీఏ ప్రెసిడెంట్‌‌‌‌గా ఉంటూ డెక్కన్ బ్లూస్ క్రికెట్ క్లబ్‌ అధ్యక్షుడిగా కూడా పని చేసినందుకు జస్టిస్‌ లావు నాగేశ్వరరావు ఏక సభ్య కమిటీ అజర్‌‌‌‌పై అనర్హత వేటు వేసింది. ఫలితంగా అజర్ పేరును ఓటర్‌ లిస్ట్‌ నుంచి తొలగించింది. దీనిపై మాజీ క్రికెటర్‌ సుప్రీంను ఆశ్రయించారు. కానీ ఈ పిటిషన్ విచారణ ఈ నెలాఖరుకు వాయిదా పడిన నేపథ్యంలో ఈ నెల 20న హెచ్సీఏ ఎన్నికల్లో అజర్ పోటీపడే చాన్స్ లేకుండా పోయింది.
