మన దేశంలో ఛాయ్ అదేనండీ టీ తాగడం అనేది నూటికి 90 శాతం మంది జీవితంలో దైనందిన చర్య. ఉదయాన్నే టీ, కాఫీలు తాగడం వల్ల నూతనోత్తేజం, ఉరకలెత్తే ఉత్సాహంతో ఉంటామనేది చాలా మంది భావన. కొందరు వేడి వేడి టీని అలానే తాగేస్తుంటారు. అలా తాగడం చాలా ప్రమాదమని, ఆరోగ్యానికి అస్సలు మంచిది కాదని వైద్యులు చెబుతున్నారు. చాలా వేడిగా ఉండే టీ తాగే అలవాటు ప్రమాదకరమని హెచ్చరిస్తున్నారు. టీని 65°C కంటే వేడిగా ఉన్నప్పుడు తాగితే క్యాన్సర్ వచ్చే ప్రమాదం ఉందని, ఇటీవల.. 'ఇంటర్నేషనల్ జర్నల్ ఆఫ్ క్యాన్సర్'లో ఒక అధ్యయనం ప్రచురించారు.
ఈ అధ్యయనంలో సుమారు 10 లక్షల మంది పాల్గొన్నారు. 65°C కంటే ఎక్కువ ఉష్ణోగ్రత ఉన్న టీ లేదా కాఫీ తాగేవారికి అన్నవాహిక క్యాన్సర్ (ఆహార నాళానికి వచ్చే ఒక రకమైన క్యాన్సర్) వచ్చే ప్రమాదం ఎక్కువగా ఉందని ఈ అధ్యయనం తేల్చింది. అలాగే.. ప్రతిరోజూ ఆరు లేదా అంతకంటే ఎక్కువ కప్పుల టీ లేదా కాఫీ తాగేవారికి ఈ క్యాన్సర్ వచ్చే ప్రమాదం 71 శాతం ఎక్కువగా ఉందని కూడా ఈ అధ్యయనం వెల్లడించింది.
చాలా వేడిగా ఉన్న టీ తాగడం వల్ల దీర్ఘకాలంలో తీవ్రమైన ఆరోగ్య ప్రమాదాలు సంభవించవచ్చు. మనం చాలా వేడిగా ఉన్న టీ (సాధారణంగా 65°C కంటే ఎక్కువ) తాగినప్పుడు, మనకు నోరు, గొంతు, ఆహార నాళం (అన్నవాహిక) ఎపిథీలియల్ పొరకి ఇబ్బందిగా అనిపిస్తుంది. ఇలా పదేపదే కాలే కాలే టీ తాగడం వల్ల చిన్నచిన్న పొక్కులు ఏర్పడతాయి.
ఈ నోటి పొక్కులు నయమయినా మళ్ళీ మళ్లీ వస్తూనే ఉంటాయి. శరీర కణజాలాలు (ముఖ్యంగా నోరు, గొంతు లోపలి పొరలు) వేడిని ఒక నిర్దిష్ట పరిమితి వరకు మాత్రమే తట్టుకోగలవు. సాధారణంగా, ఈ కణజాలాలు 60°C వరకు ఉష్ణోగ్రతలను కొద్దిసేపు తట్టుకోగలవు. అయితే, ఉష్ణోగ్రతలు 65°C లేదా అంతకంటే ఎక్కువకు చేరితే మాత్రం నష్టం తప్పదు.
