టాలీవుడ్ క్రేజీ కపుల్ విజయ్ దేవరకొండ, రష్మిక మందన్న జంటగా నటించిన 'రణబాలి' బాక్సాఫీస్ వద్ద సందడి చేస్తోంది. పెళ్లి తర్వాత ఈ జంట కలిసి ప్రేక్షకుల ముందుకు వచ్చిన తొలి సినిమా కావడంతో విడుదలకు ముందే భారీ హైప్ క్రియేట్ అయింది. అక్టోబర్ 16న థియేటర్లలోకి వచ్చిన ఈ పీరియాడిక్ యాక్షన్ డ్రామా తొలి రోజు వసూళ్లతో ట్రేడ్ వర్గాల దృష్టిని ఆకర్షించింది. మరోవైపు, సినిమా విజయాన్ని ప్రేక్షకులతో కలిసి సెలబ్రేట్ చేసుకునేందుకు రంగంలోకి దిగిన విజయ్.. తాజాగా భార్య రష్మికతో కలిసి విజయవాడలో సందడి చేశాడు.
దుర్గమ్మను దర్శించుకున్న క్రేజీ కపుల్!
సినిమా ప్రమోషన్లలో భాగంగా విజయవాడ చేరుకున్న విజయ్ దేవరకొండ, రష్మిక మందన్న ఇంద్రకీలాద్రిపై కొలువైన కనకదుర్గమ్మను దర్శించుకున్నారు. అమ్మవారి ఆశీస్సులు తీసుకున్న అనంతరం విజయ్ మాట్లాడుతూ.. దుర్గమ్మను దర్శించుకోవడం ఎంతో సంతోషంగా ఉందన్నారు. 'రణబాలి'ని ప్రేక్షకులు ఆదరిస్తుండటం ఆనందాన్నిస్తోందని తెలిపారు. అందరికీ దసరా శుభాకాంక్షలు కూడా తెలియజేశారు. సినిమా విడుదలకు ముందు నిర్వహించిన ప్రెస్‌మీట్‌లో ప్రేక్షకులను స్వయంగా కలుస్తానని చెప్పిన విజయ్.. ఆ మాటను నిలబెట్టుకుంటూ థియేటర్ల వద్ద అభిమానులను కలుస్తున్నారు.
తొలి రోజు కలెక్షన్లు ఎంతంటే?
ట్రేడ్ వర్గాల అంచనాల ప్రకారం 'రణబాలి' భారత్‌లో తొలి రోజు సుమారు రూ.9.25 కోట్ల నెట్ వసూళ్లు సాధించింది. దేశీయ గ్రాస్ దాదాపు రూ.10.75 కోట్లు కాగా, ఓవర్సీస్ నుంచి సుమారు రూ.5.75 కోట్ల గ్రాస్ వచ్చినట్లు సమాచారం. దీంతో ప్రపంచవ్యాప్తంగా మొదటి రోజు గ్రాస్ వసూళ్లు రూ.16.50 కోట్లకు చేరినట్లు ట్రేడ్ లెక్కలు చెబుతున్నాయి.
వీకెండ్‌పైనే భారీ ఆశలు..
రాహుల్ సంకృత్యాన్ దర్శకత్వం వహించిన ఈ చిత్రంలో విజయ్ రణబాలిగా, రష్మిక జయమ్మగా కనిపించారు. 1876–78 మద్రాస్ కరువు, బ్రిటిష్ వలస పాలన నేపథ్యంలో సాగే కథ ప్రేక్షకుల్లో ఆసక్తిని పెంచుతోంది. మైత్రీ మూవీ మేకర్స్ నిర్మించిన ఈ సినిమాకు అజయ్–అతుల్ సంగీతం అందించారు.
ఇప్పుడు శని, ఆదివారాల వసూళ్లతో పాటు దసరా సెలవులు కూడా సినిమాకు కీలకం కానున్నాయి. ప్రేక్షకుల నుంచి వచ్చే స్పందన, ఆక్యుపెన్సీ పెరుగుదల బాక్సాఫీస్ ప్రయాణాన్ని నిర్ణయించనున్నాయి. తొలి రోజు వసూళ్లను దాటి 'రణబాలి' మరింత దూసుకెళ్తుందా? ఈ వీకెండ్‌లో విజయ్ దేవరకొండ ఎలాంటి వసూళ్ల సునామీ సృష్టిస్తాడో చూడాలి.
The #Ranabaali pair at the Kanaka Durga Temple in Vijayawada ✨ Book your tickets now! 🎟️ https://t.co/ux77cy5vha #Ranabaali #ConqueringCinemas https://t.co/PrQwc17OmM
— RANABAALI (@RanabaaliFilm) October 17, 2026
