సూర్య శ్రీనివాస్, సంజీవ్ కుమార్ ప్రధాన పాత్రల్లో భాస్కర్ జక్కుల తెరకెక్కిస్తున్న చిత్రం ‘జమాన’. తేజస్వి అడప, బొద్దుల లక్ష్మణ్, శివకాంత్, శశికాంత్ నిర్మిస్తున్నారు. ఈ మూవీ ట్రైలర్ లాంచ్ ఈవెంట్ బుధవారం ప్రసాద్ ల్యాబ్స్లో జరిగింది. ఈ సందర్భంగా దర్శకుడు భాస్కర్ జక్కుల మాట్లాడుతూ ‘హైదరాబాద్ పాతబస్తీ నేపథ్యంలో నేటి యువతరం ఆలోచనలకు అద్దం పట్టేలా తెరకెక్కించాం.
చక్కని థ్రిల్లర్ సబ్జెక్ట్తో డిఫరెంట్గా ఉంటుంది. సినిమా ఆద్యంతం వినోదంతో పాటు ఊహించని ట్విస్ట్లు ఉంటాయి’ అని చెప్పాడు. చక్కని వినోదంతో పాటు నేటి యూత్కి కనెక్ట్ అయ్యే అన్ని అంశాలు ఇందులో ఉన్నాయని హీరోలు సూర్య శ్రీనివాస్, సంజీవ్ కుమార్ తెలిపారు. నిర్మాత శివకాంత్ మాట్లాడుతూ ‘దర్శకుడు భాస్కర్ గ్రిప్పింగ్ స్క్రీన్ ప్లేతో తీశారు. జనవరి 30న థియేటర్స్లో విడుదల చేయబోతున్నాం. తప్పకుండా అందరికీ నచ్చే సినిమా అవుతుందని నమ్ముతున్నాం’ అని అన్నారు.
