పండుగ సీజన్‌ వచ్చిందంటే చాలు ఆన్లైన్ రిటైల్‌ పోర్టల్స్ అన్నీ భారీ ఆఫర్స్ ఇస్తూ కస్టమర్లను ఆకర్షిస్తూ ఉంటాయి. ఇందులో భాగంగా ఈ సంవత్సరం ప్రముఖ ఆన్లైన్ రెటైల్ సంస్థ ఫ్లిప్‌కార్ట్‌ (Flipkart ) బిగ్‌ బిలియన్‌ సేల్ నిర్వహిస్తున్న విషయం తెలిసిందే. అక్టోబర్ 8 నుండి 15 వరకు ఈ బిగ్‌ బిలియన్‌ సేల్ (Big Billion sale) నిర్వహిస్తోంది. ఇందులో భాగంగా మొబైల్ ఫోన్లు, ఎలక్ట్రానిక్‌ వస్తువులపై భారీ డిస్కౌంట్‌ ఆఫర్‌ పెట్టనుంది.
ఇక ఈ భారీ సేల్ కు సంబంధించి ప్రకటనను బాలీవుడ్‌ సూపర్ స్టార్ అమితాబ్ బచ్చన్ (Amitabh Bachchan)తో చేయించింది ఫ్లిప్‌కార్ట్‌. అయితే.. ఈ ప్రకటనపై ఇప్పుడు కొత్త వివాదం మొదలైంది. దీంతో అమితాబ్ కూడా చిక్కుల్లో పడ్డారు. తాజాగా ఫ్లిప్‌కార్ట్‌ చేసిన ప్రకటనపై ఆల్‌ ఇండియా ట్రేడర్స్‌ అసోసియేషన్‌ అభ్యంతరం వ్యక్తం చేసింది. ఆ ప్రకటన కస్టమర్స్ ను తప్పుదోవ పట్టించేలా, చిన్న వర్తకులకు నష్టం కలిగించేలా ఉందని ఆరోపించింది. ఈ నేపథ్యంలో ఫ్లిప్‌కార్ట్‌పై చర్యలు తీసుకోవాలని సీసీపీఏ కు ఫిర్యాదు చేసింది. అదేవిధంగా ఈ యాడ్‌లో కనిపించిన అమితాబ్ బచ్చన్ పై కూడా చర్యలు తీసుకోవాలని కోరింది. బిగ్‌ బిలియన్‌ సేల్ ప్రకటనను వెంటనే తొలగించడమే కాకుండా.. ఫ్లిప్‌కార్ట్‌ అండ్ అమితాబ్కు రూ.10లక్షలు చొప్పున జరిమానా విధించాలని కోరింది.
