గచ్చిబౌలి విప్రో సర్కిల్లో ప్రమాదానికి కారణం అయిన టిప్పర్ డ్రైవర్ బీహార్కు చెందిన వ్యక్తిగా గుర్తించామని గచ్చిబౌలి సీఐ సురేష్ తెలిపారు. నిర్లక్ష్యంగా వాహనం నడపడమే ప్రమాదానికి కారణమని చెప్పారు. అయితే.. బ్రేకులు ఫెయిల్ అయ్యాయా లేదా అన్నది తెలియాల్సి ఉందన్నారు. ఈ ప్రమాదంలో మృతి చెందిన డెలివరీ బాయ్ నసిర్ హుస్సేన్కు భార్య ఇద్దరు కుమారులు ఉన్నారని సీఐ సురేష్ వెల్లడించారు. ఇక ప్రమాదంలో గాయపడ్డ అబ్దుల్ రజాక్ ఎమ్ జీఐటీలో థర్డ్ ఇయర్ చదువుతున్నట్లు ఆయన తెలిపారు. సినిమా చూసి హాస్టల్కు వెళ్తున్న సమయంలో అబ్దుల్ రజాక్ ప్రమాదానికి గురైనట్లు చెప్పారు. ఇక అబ్దుల్ రజాక్తో పాటు బైక్ పై ఉన్న మరో యువకుడు సేఫ్గా ఉన్నట్లు తెలిపారు.
ఇదే ప్రమాదంలో సుబెందు దాస్ అనే వ్యక్తి కూడా గాయపడ్డాడు. అతడికి కాలు విరగడంతో కాంటినెంటల్ ఆస్పత్రిలో చికిత్స అందిస్తున్నారు. నానక్ రామ్ గూడాలో ఉన్న ఫ్రెండ్ కోసం వెళ్తున్న సమయంలో సుబెందు దాస్ ప్రమాదానికి గురైనట్లు గచ్చిబౌలి సీఐ సురేష్ తెలిపారు. టిప్పర్ డ్రైవర్ పోలీసులు అదుపులోనే ఉన్నట్లు సీఐ సురేష్ వెల్లడించారు. గచ్చిబౌలి విప్రో సర్కిల్లో ఓ టిప్పర్ ఆగి ఉన్న 4 కార్లు, రెండు బైక్ లపైకి దూసుకెళ్లిన విషయం తెలిసిందే.. ఘటనలో ఓ వ్యక్తి చనిపోగా... ఐదుగురికి గాయాలు అయ్యాయి. వీరిలో ముగ్గురి పరిస్థితి విషమంగా ఉన్నట్లు సమాచారం. ప్రస్తుతం వీరంతా ఆస్పత్రిలో చికిత్స పొందుతున్నారు.
