కొణిజర్ల, వెలుగు: కొణిజర్ల మండలంలోని శ్రీనివాస రైస్ మిల్లులో రూ.6.88 కోట్ల విలువైన ధాన్యం పక్కదారి పట్టినట్లు తేలడంతో, ఈ వ్యవహారంపై విచారణ జరిపి చర్యలు తీసుకోవాలని కోరుతూ సివిల్ సప్లయిస్ కార్పొరేషన్ ఖమ్మం జిల్లా మేనేజర్ ఎం. మల్లికార్జునబాబు కొణిజర్ల పోలీస్‌‌‌‌‌‌‌‌స్టేషన్‌‌‌‌‌‌‌‌లో ఫిర్యాదు చేశారు. 2024-–25 రబీ, 2025-–26 ఖరీఫ్, రబీ సీజన్లలో కనీస మద్దతు ధర పథకం కింద సేకరించిన ధాన్యానికి సంబంధించి కస్టమ్ మిల్లింగ్ బియ్యం ప్రభుత్వానికి అప్పగించాల్సి ఉంది. కాగా, యజమాని వాటిని అప్పగించడంలో విఫలమయ్యారు.
దీంతో ఆగస్టు 22న వరంగల్ విజిలెన్స్, అండ్ఎన్ఫోర్స్మెంట్ అధికారులు, ఖమ్మం పౌరసరఫరాల శాఖ డిప్యూటీ తహసీల్దార్, కార్పొరేషన్ సాంకేతిక సహాయకుడు జరిపిన తనిఖీల్లో మొత్తం 1,803.426 మెట్రిక్‌ టన్నుల ధాన్యం పక్కదారి పట్టినట్లు గుర్తించి జరిమానాతో కలిపి దీని విలువ రూ.6,88,51,886గా లెక్కించారు. ఈ వ్యవహారంలో ముందస్తు బెయిల్ కోసం మిల్లు యజమాని సెప్టెంబర్ 15న తెలంగాణ హైకోర్టును ఆశ్రయించగా, కోర్టు విచారణను నవంబర్ 11కి వాయిదా వేసి అప్పటివరకు బలవంతపు చర్యలు తీసుకోవద్దని ఆదేశించడంతో ఎస్సై తదుపరి చర్యల నిమిత్తం ఉన్నతాధికారులకు నివేదిక సమర్పించారు.
