కొత్త వాళ్లను ప్రోత్సహించాలనే ఉద్దేశ్యంతో ‘శ్రీ చిదంబరం గారు’ సినిమా తీశామని నిర్మాత చింతా గోపాలకృష్ణారెడ్డి అన్నారు. వంశీ తుమ్మల, సంధ్యా వశిష్ట జంటగా వినయ్ రత్నం దర్శకత్వంలో వినీష రెడ్డితో కలిసి ఆయన నిర్మించిన ఈ చిత్రం ఫిబ్రవరి 6న విడుదలవుతోంది.
ఈ సందర్భంగా గోపాలకృష్ణారెడ్డి మాట్లాడుతూ ‘ఈ మూవీ టీమ్ నాలుగేళ్లు కష్టపడి క్రౌడ్ ఫండెడ్ సినిమాగా దీన్ని స్టార్ట్ చేశారు. వీళ్ల కష్టం చూసి మా అమ్మాయి ఈ సినిమా ప్రపోజల్ తీసుకొచ్చింది. మారేడుమిల్లి ప్రాంతంలోని అందమైన లొకేషన్స్లో తీసిన ఫీల్ గుడ్ సినిమా ఇది. ప్రేక్షకులు రిలాక్స్ అయ్యే ప్లెజెంట్ కంటెంట్తో వస్తోంది. మట్టిలో మాణిక్యం లాంటి కథతో సినిమా చాలా నేచురల్గా వచ్చింది.
హీరోహీరోయిన్స్ క్యారెక్టర్స్ బాగుంటాయి. పాటలకు మంచి రెస్పాన్స్ వచ్చింది. వంశీ నందిపాటి డిస్ట్రిబ్యూషన్ చేస్తున్నారు. టికెట్ రేట్ కూడా రూ.99 మాత్రమే పెడుతున్నాం. ఇక మా సంస్థలో ప్రస్తుతం ‘రావు బహద్దూర్’ అనే సినిమా షూట్ జరుగుతోంది. కొత్త దర్శకుడితో మరో సినిమా చేస్తున్నాం. రూ.99ల టికెట్ రేట్ తో ‘చిదంబరం గారు’.
మంచి కంటెంట్ని సెలెక్ట్ చేసుకుని సినిమాలు చేస్తే, ఎవరికి నష్టం రాదు. ఒక మేనేజర్ వర్క్ చేసినట్లే, నిర్మాత కూడా ఎప్పుడూ కష్టపడాలి. అప్పుడే ప్రాజెక్ట్ ఫలితం బాగుంటుంది. ఈ రోజు కొన్ని వందల సినిమాలు రిలీజ్ కాకుండా బాక్స్లో ఉన్నాయి. నేను కూడా ఈ చిత్రానికి ఓటీటీ డీల్ కోసం వెయిట్ చేసి ఉంటే, ఆ బాక్స్లోకే చేరేది. సినిమాకు పెట్టిన డబ్బులు తిరిగి వస్తే, మరో సినిమా చేయడానికి అవకాశం ఉంటుంది. మాకు కె విశ్వనాథ్ రూపొందించినటువంటి సినిమాలను నిర్మించాలని ఉంది. నా సినిమా వల్ల ఎవరూ నష్టపోకూడదు అనుకుంటాను. ఆ నష్టం ఏదైనా ఉంటే మాత్రం నేనే భరిస్తా. అలాగే ‘క’ సినిమాకు త్వరలోనే సీక్వెల్ అనౌన్స్ చేస్తాం’ అని చెప్పారు.
ఒక మనిషిని నువ్వు ప్రేమించగలగాలి అంటే మొదట నిన్ను నువ్వు ప్రేమించాలి అనేది ఈ కథ సారాంశం. పక్క వాళ్లతో పోల్చుకుంటూ లైఫ్ను లీడ్ చేస్తున్న ప్రస్తుత సమాజ తీరును సున్నితమైన భావోద్వేగాలతో మిళితం చేస్తూ వస్తున్న చిదంబరం ఎలాంటి సక్సెస్ అందుకోనుందో చూడాలి.
